13.01.2026 | 23:28
ՆԳՆ շրջիկ սպասարկման գրասենյակները ծառայություններ կմատուցեն Գեղարքունիքի և Վայոց ձորի մարզերում
102-րդ ռազմակայանի՝ թմրանյութեր շրջանառած ծառայողները լքել են Հայաստանը․ ԻՔՄ
Հասարակություն
03.03.2025 | 16:16
«Իրազեկ քաղաքացիների միավորումն» ու Armenian Military Portal-ը Հայաստանում ռուսաստանյան 102-րդ ռազմակայանի գործունեության մշտադիտարկման սահմաններում հայտնաբերել են, որ ռազմակայանի երկու զինծառայողներ Հայաստանի ոստիկանության կողմից ձերբակալվել են թմրանյութերի ապօրինի շրջանառության համար, սակայն իրավապահների անգործության հետևանքով ռազմակայանի ղեկավարությունը հասցրել է «փախցնել» այդ ծառայողներին:
Այսպիսով, պարզվել է, որ 2024 թվականի դեկտեմբերի 17-ին 102-րդ ռազմակայանի ծառայող ՌԴ քաղաքացիներ Մաքսիմ Վոլոշինը և Վիտալի Անդեյենկոն Գյումրիում ՀՀ ոստիկանության Մուշի բաժնի ծառայողների կողմից ձերբակալվել են թմրանյութերի ապօրինի շրջանառության կասկածանքով: Խոսքը, մասնավորապես, a-PVP տեսակի թմրանյութի մասին է, որը կատինոնների դասի ծանր արհեստական թմրանյութ է (երբեմն անվանվում է «ֆլակկա» կամ «գրավել»):
Ոստիկանության կողմից նյութերը փոխանցվել են ՀՀ քննչական կոմիտե, որտեղից ՌԴ զինվորականները հարցաքննվել ու ազատ են արձակվել, իսկ մեղադրանքն իրենց առաջադրվել է միայն երկու ամիս անց՝ մեր կողմից հարցը բարձրացնելուց հետո` 2025 թ․ փետրվարի 13-ին (թեև ծառայողները դեռ ձերբակալվելիս ընդունել էին, որ թմրանյութերի շրջանառություն են իրականացրել):
Օգտագործելով զինծառայողների ազատության մեջ գտնվելու ժամանակահատվածը՝ ՌԴ հարավային ռազմական շրջանի ղեկավարությունն այդ զինծառայողներին տեղափոխել է Ռուսաստան՝ պաշտպանելով նրանց Հայաստանում թմրանյութերի ապօրինի շրջանառության համար քրեական հետապնդումից: Ընդ որում, երկու ծառայողներից մեկը Հայաստանից հեռացել է ՌԴ ՊՆ ռազմական օդանավով՝ «Էրեբունի» օդանավակայանից:
Այժմ՝ Հայաստանը լքելուց հետո, Մաքսիմ Օլեգի Վոլոշինի և Վիտալի Նիկոլայի Անդեյենկոյի նկատմամբ խափանման միջոց է ընտրված կալանքը, և հայտարարված է հետախուզում:
Այսպիսով արձանագրենք, որ Հայաստանում ռուսաստանյան 102-րդ ռազմակայանի՝ թմրանյութերի հավանական ապօրինի շրջանառություն իրականացրած ծառայողները կարողացել են փախչել Հայաստանից և խուսափել քննությունից՝ ՌԴ ՊՆ հարավային ռազմական օկրուգի ղեկավարության աջակցության և ՀՀ իրավապահ մարմինների անգործության արդյունքում։
