08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Թրամփի հատուկ ներկայացուցիչը գաղտնի բանակցություններ է վարում Շվեյցարիայում «Հյուսիսային հոսք 2» գազատարի գործարկման շուրջ․ Bild
Քաղաքականություն
03.03.2025 | 15:35
Շվեյցարիայում շաբաթներ շարունակ գաղտնի բանակցություններ են ընթանում այն մասին, թե ինչպես էժան ռուսական գազը կարող է շուտով նորից սկսել հոսել Գերմանիա: Այս մասին հայտնում է գերմանական Bild-ը, որին վկայակոչում է DW-ի ռուսական ծառայությունը։
Լրատվամիջոցի տվյալներով՝ ԱՄՆ նախագահի հատուկ հանձնարարություններով բանագնաց Ռիչարդ Գրենելը մի քանի ոչ պաշտոնական այց է կատարել Շվեյցարիա՝ գործարքը քննարկելու համար։ «Հյուսիսային հոսք 2» գազատարը շահագործող ընկերության կենտրոնակայանը գտնվում է Շտայնհաուզենում՝ Շվեյցարիայի Ցուգ կանտոնում։
Գաղափարն այն է, որ Վաշինգտոնը և Մոսկվան կնքեն մատակարարման համաձայնագիր, որում ԱՄՆ-ը հանդես կգա որպես միջնորդ և ռուսական գազը «Հյուսիսային հոսք 2» գազատարով կմատակարարի Մեքլենբուրգ՝ Պոմերանիա: Այս կերպ ԱՄՆ-ը կկարողանա կարգավորել մատակարարումները, միաժամանակ, գումար աշխատել։
Լրատվամիջոցի տվյալներով՝ պլաններ կան նաև «Հյուսիսային հոսք 1» խողովակաշարի հետ կապված։ Վերանորոգումից հետո այն կարող է օգտագործվել Ֆինլանդիայից ջրածնի տեղափոխման համար: Bild-ը նշում է, որ ԱՄՆ վարչակազմն ուղղակի մասնակցություն չի ունենա գործարքում։ Փոխարենը կմիանան ամերիկացի ֆինանսական ներդրողները, ինչպիսին է ձեռնարկատեր Սթիվեն Լինչը։
Բացի այդ, ըստ Financial Times-ի, ՌԴ նախագահ Վլադիմիր Պուտինի մտերիմ ընկեր Մաթիաս Ուորնիգը, որը եղել է Գազպրոմի «Հյուսիսային հոսք 2» դուստր ձեռնարկության տնօրենը, նույնպես առաջարկում է Թրամփի վարչակազմին ամերիկացի ներդրողների աջակցությամբ վերսկսել գազի մատակարարումը Ռուսաստանից Գերմանիա։ Պլանը կյանքի կոչելու դեպքում այն ԱՄՆ-ին «աննախադեպ վերահսկողություն կտա Եվրոպայի էներգամատակարարման վրա»։
Լրատվամիջոցը գրում է, որ Գերմանիայի կառավարությունը դեռևս չի ներգրավվել գաղտնի բանակցություններում։ Կառավարական շրջանակները հայտնել են, որ ոչինչ չգիտեն Շվեյցարիայում Գրենելի հանդիպումների մասին, նաև հերքել մասնակցությունը գործընթացին։
Դեռևս պարզ չէ՝ արդյո՞ք գործարքն իրականություն կդառնա։ ԱՄՆ-ի և Ուկրաինայի նախագահներ Դոնալդ Թրամփի և Վլադիմիր Զելենսկիի միջև Սպիտակ տանը ծագած սկանդալից հետո արագ զինադադարի հնարավորությունները նվազել են, իսկ գազային գործարքի վերաբերյալ կանխատեսումները՝ վատթարացել:
Թարգմանությունը՝ Էմմա Չոբանյանի
