Մի 20-ամյակ է` պետությանը չենք կարողանում համոզել, որ կինոոլորտի ֆինանսավորման ձևը սխալ է. Արմինե Անդա

«Ցավոք, Հայաստանը չունի մշակույթը, այդ թվում`կինոն զենք դարձնելու կամք, մենք վաղուց կարող էինք դա անել, ինչպես դա արեց Թուրքիան թե´ կինոյի, թե´ գրականության հարցում, ինչպես արեց Կորեան: Մենք չենք հավատում, որ մշակույթը կարող է զենք դառնալ, այդ ուղղությամբ մեր քայլերը, փորձերը դանդաղ են»,- Factor TV-ի հետ զրույցում տեսակետ է հայտնում դերասանուհի, պրոդյուսեր, ռեժիսոր, մանկագիր Արմինե Անդան (Արմինե Աբրահամյան):

Էգոյանի, Ռազավիի, Վաթինյանի, Բաղդասարյանի ֆիլմերում նկարահանված դերասանուհուն հարցրինք`Հայաստանում կա՞ ձևավորված կինոմիջավայր. «Կամաց-կամաց ձևավորում ենք այդ միջավայրը: Մի քանի տարի առաջ այն ընդհանրապես գոյություն չուներ: Այսօր այդ սերմերը կան, պարզապես ոլորտի զարգացման համար ճիշտ ռազմավարություն է պետք: Մի 20-ամյակ է` պետությանը չենք կարողանում համոզել, որ կինոոլորտի ֆինանսավորման ձևը սխալ է: Հիմա դանդաղ, բայց առաջխաղացում նկատվում է»,-ասում է նա:

Արմինե Անդայի հետ զրուցել ենք նաև «Հայֆիլմի» պոտենցիալից, որը տարիներ շարունակ չի օգտագործվել. «Հայֆիլմը» սերմ է, որը ջրելու փոխարեն բզկտել ու կորցրել ենք. այն չպետք է լինի մենաշնորհ: Այն պետք է դառնա հնարավորություն բոլորի համար, պետք է տեխնիկապես վերազինվի ու տրվի կինոարտադրողներին»,-նշում է նա:

Մանկագիրը նշում է, որ հատկապես պատերազմից հետո վերադարձել է հեքիաթի ժանրին. «Մենք իրար ատում ենք. սա ազգային պարտություն է` մինչև պատերազմը, զենք` թշնամու ձեռքում: Մեր ժողովուրդը սոցցանցերում ցույց է տալիս, որ չկա միասնություն, ամեն փոքր բանի համար կարող ենք իրար վիրավորել: Արվեստը, կրթությունը պետք է համախմբեն մեզ»:

Մանրամասները`տեսանյութում:

Աննա Բաբաջանյան