Չգիտեմ՝ վիճաբանությունը պլանավորվա՞ծ է եղել, թե՝ ոչ․ Զելենսկի

«Ոչ ոք պատերազմն ավարտելու ավելի մեծ ցանկություն չունի, քան մենք՝ ուկրաինացիներս»․ Զելենսկին հարցազրույց է տվել Fox News-ին Սպիտակ տանը Թրամփի հետ բանավեճից հետո. գրում է meduza.io-ն։

«Առանց Միացյալ Նահանգների շարունակական աջակցության, մեզ համար դժվար կլիներ, այդ իսկ պատճառով ես այստեղ եմ։

Ռուսները մտան մեր տները և սպանեցին մեզ, դուք չեք կարող մոռանալ դրա մասին և ասել, որ Պուտինը հիանալի տղա է: Մենք բաց կլինենք Ռուսաստանի հետ դիվանագիտության համար, երբ ունենանք անվտանգության երաշխիքներ։

Ես չեմ կարող փոխել ուկրաինացիների վերաբերմունքը ռուսների նկատմամբ. նրանք մեզ սպանում են։ ԱՄՆ-ը մեր բարեկամն է, եվրոպացիները՝ մեր բարեկամներն են, Ռուսաստանը՝ մեր թշնամին է։

Մենք խաղաղություն ենք ուզում, ոչ ոք մեզանից շատ չի ուզում ավարտել պատերազմը։ Պուտինին կանգնեցնելու համար մենք պետք է ԱՄՆ-ի հետ նույն կողմում լինենք։ Ռեյգանն ասել է՝ «խաղաղությունը պատերազմի բացակայությունը չէ»։ Ես շատ շնորհակալ եմ ամերիկացի ժողովրդին, նախագահ Թրամփին և Կոնգրեսի աջակցությանը, և ես միշտ երախտապարտ եմ եղել, դուք օգնեցիք մեզ գոյատևել:

Չգիտեմ՝ վիճաբանությունը պլանավորված է եղել, թե՝ ոչ։ Չեմ կարծում, որ մենք վատ բան ենք արել։ Ես միշտ բաց եմ լրատվամիջոցների համար, բայց որոշ բաներ պետք է մնան փակ դռների հետևում։ Թրամփն ասաց, որ ցանկանում է լինել մեջտեղում, իսկ ես ուզում եմ, որ նա մեր կողմից լինի։ Ես չէի ցանկանա կորցնել ԱՄՆ-ի գործընկերների աջակցությունը»։

Թարգմանությունը՝ Անահիտ Խաչատրյանի