03.04.2025 | 23:23
ՀՀ ԲՏԱ նախարարը հանդիպել է Էստոնիայի արդարադատության և թվայնացման նախարարի հետ
Կադիրովը որոշել է պարգևատրել ադրբեջանական կործանված օդանավի ողջ մնացած բորտուղեկցորդներին
Քաղաքականություն
28.02.2025 | 23:06
Չեչնիայի ղեկավար Ռամզան Կադիրովը որոշել է պարգևատրել 2024 թվականի դեկտեմբերի 25-ին Ակտաուում կործանված Բաքու-Գրոզնի չվերթն իրականացնող «Ադրբեջանական ավիաուղիների» (AZAL) Embraer 190 օդանավի երկու ողջ մնացած բորտուղեկցորդներին՝ Զուլֆուգար Ասադովին և Այդանա Ռահիմլիին։ Այս մասին նա հայտնել է Տելեգրամի իր ալիքում։
«Ես որոշում եմ կայացրել պարգևատրել անցյալ տարվա դեկտեմբերին Բաքու-Գրոզնի չվերթի ժամանակ կործանված «Ադրբեջանական ավիաուղիների» Embraer E190 մարդատար օդանավի անձնակազմի ողջ մնացած անդամներին։ Բորտուղեկցորդներ Զուլֆուգար Ասադովը և Աիդան Ռահիմլին, որոնք ցուցաբերել են բացառիկ քաջություն և բարձր պրոֆեսիոնալիզմ, առաջադրվել են «Չեչնիայի Հանրապետությանը մատուցած ծառայությունների համար» պարգևին։ Գրոզնիում ավիավթարի զոհերի հիշատակին հուշատախտակ կտեղադրվի»,- նշել է Կադիրովը։
Նա նշել է, որ խորին երախտագիտություն է հայտնում նրանց նվիրվածության և պրոֆեսիոնալիզմի համար։
«Նրանց գործողությունները դարձան իսկական ծառայության և մարդասիրության օրինակ։ Մենք կհիշենք նրանց ներդրումը ուղևորների անվտանգության ապահովման գործում։ Մենք անկեղծորեն կիսում ենք եղբայրական ադրբեջանական ժողովրդի վիշտը և աղոթում մահացածների հոգիների համար»,- գրել է Չեչնիայի ղեկավարը։
Հիշեցնենք՝ ավիաաղետի հետևանքով զոհվել է 38 ուղևոր, այդ թվում՝ անձնակազմի 3 անդամ, 29-ը ողջ է մնացել:
Ավելի վաղ Ղազախստանի Տրանսպորտի նախարարությունը հրապարակել էր Ակտաուի մերձակայքում «Ադրբեջանական ավիաուղիներին» (AZAL) պատկանող Embraer 190 ինքնաթիռի կործանման վերաբերյալ նախնական զեկույցը։ Բաքուն շարունակում է պնդել, որ օդանավը խոցվել է ՌԴ-ի կողմից «Պանցիր-Ս» համակարգով՝ հայտարարելով, թե հրթիռի բեկորն իր տրամադրության տակ է։
Բացի այդ, Ադրբեջանի իշխանամերձ լրատվամիջոցները հայտնում են, որ Բաքուն պատրաստվում է ՌԴ-ի դեմ օդանավի կործանման գործով հայց ներկայացնել միջազգային դատարան։
Թարգմանությունը՝ Էմմա Չոբանյանի
