Ղազախստանը հրապարակել է ադրբեջանական օդանավի աղետի նախնական զեկույցը․ Բաքուն պնդում է՝ ՌԴ-ի կողմից օդանավը խոցած հրթիռի բեկորն իր մոտ է

2024 թվականի դեկտեմբերին Ռուսաստանից Ղազախստան թռչելուց հետո կործանված ադրբեջանական ուղևորատար օդանավը խոցվել է ռուսական «Պանցիր-Ս» հակաօդային պաշտպանության համակարգի կողմից։ Այս մասին Reuters-ին հայտնել է Ադրբեջանի կառավարության աղբյուրը։

«Ադրբեջանական կողմի մոտ է «Պանցիր-Ս» հրթիռի բեկորը, որը դուրս է բերվել օդանավից և բացահայտվել միջազգային փորձաքննության արդյունքում»,- ասել է աղբյուրը։

Ղազախստանի Տրանսպորտի նախարարությունն էլ հրապարակել է Ակտաուի մերձակայքում «Ադրբեջանական ավիաուղիներին» (AZAL) պատկանող Embraer 190 ինքնաթիռի կործանման վերաբերյալ նախնական զեկույցը։ Փաստաթղթում ասվում է, որ ինքնաթիռի պահպանված մասերի ուսումնասիրությամբ հայտնաբերվել են տարբեր չափերի վնասներ։ Դրանք հայտնաբերվել են ֆուզելյաժի, ուղղահայաց կայունացուցիչի, վերելակի և ղեկի պոչի հատվածում: Նմանատիպ վնաս է գրանցվել օդանավի ձախ շարժիչի և ձախ թևի, ինչպես նաև դրա բաղադրիչների վրա։

Զեկույցից հետևում է, որ  ինքնաթիռը վնասվել է «երկրի մակերեսին հարվածելուց առաջ»: Վնասները, հավանաբար, առաջացել են «արտաքին օբյեկտների» պատճառով։ Ինքնաթիռի տարբեր հատվածներից հանվել են «օտար մետաղական առարկաներ»։

Փաստաթղթի համաձայն՝  անձնակազմն առաջին անգամ խնդիրների է բախվել տեղական ժամանակով 05:13:31-ին։ Անձնակազմը հայտնել է հետևի նստատեղերի հատվածում պայթյունի մասին։ Դրանից հետո ինքնաթիռում ևս մի քանի համակարգեր մասամբ կամ ամբողջությամբ խափանվել են: Ժամը 05:13:56-ին գրանցվել է երկրորդ ձայնային հարվածը։

Զեկույցից նաև պարզ է դառնում, որ Դոնի Ռոստովում ավիակարգավարը այլ քաղաքների կարգավարներին Գրոզնիում «Գորգ» պլանի գործարկման մասին հայտնել է այն բանից հետո միայն, երբ օդանավը Գրոզնիից հեռացել է Բաքվի ուղղությամբ։

Ավելի վաղ նույնպես Ադրբեջանի կառավարության աղբյուրները լրատվամիջոցներին հայտնել էին, որ ինքնաթիռը խոցվել է ռուսական «Պանցիր-Ս» հակաօդային պաշտպանության համակարգի կողմից։

Թարգմանությունը՝ Էմմա Չոբանյանի