03.04.2026 | 23:13
NASA-ն հրապարակել է Երկրի նոր լուսանկարը
Կրեմլը Ուկրաինայի բռնակցված տարածքներն անվանել է Ռուսաստանի «անբաժանելի մաս»
Քաղաքականություն
27.02.2025 | 15:29
Կրեմլի խոսնակ Դմիտրի Պեսկովը «ՌԴ-ի անբաժան մաս» է կոչել Ուկրաինայի տարածքները, որոնք Ռուսաստանը բռնակցել է իրեն, գրում է Meduza-ն։
«Այն տարածքները, որոնք դարձել են ՌԴ սուբյեկտներ, որոնք արձանագրված են մեր երկրի Սահմանադրության մեջ, դրանք մեր երկրի՝ Ռուսաստանի անբաժանելի մասն են հանդիսանում։ Դա բացարձակապես անվիճելի, անքննարկելի փաստ է»,- հայտարարել է Պեսկովը։
Հարցին՝ արդյո՞ք ԱՄՆ նախագահ Դոնալդ Թրամփի՝ «Ուկրաինային հնարավորինս շատ տարածքներ վերադարձնելու» խոստումը կբարդացնի ռուս-ուկրաինական պատերազմին վերջ տալու շուրջ բանակցությունները, Պեսկովը պատասխանել է, որ եթե Ռուսաստանի և ԱՄՆ-ի քաղաքական կամքը պահպանվի, ապա հնարավոր կլինի «անցնել ուկրաինական կարգավորման գործընթացը»։
Նա նշել է, որ Ուկրաինայում պատերազմը չափազանց բարդ է, և ոչ ոք չի ակնկալում «հեշտ և արագ» լուծումներ։
«Այն, ինչ մենք տեսնում ենք, այն է, որ նախագահ Թրամփն ինքն է խոսում և պատրաստ է լսել ուրիշներին: Սա շատ կարևոր է, և դա սկզբունքորեն տարբերում է Վաշինգտոնի ներկայիս վարչակազմը նախորդից»,- ասել է Պեսկովը։
Փետրվարի 26-ին ԱՄՆ Նախարարների կաբինետի առաջին նիստում Դոնալդ Թրամփը հայտարարել էր, որ Վաշինգտոնը կփորձի օգնել Կիևին վերադարձնել Ռուսաստանի կողմից բռնակցված ուկրաինական տարածքների մի մասը։
Թարգմանությունը՝ Էմմա Չոբանյանի
