Ուկրաինան պետք է մոռանա ՆԱՏՕ-ին միանալու մասին․ Թրամփ

ԱՄՆ նախագահ Դոնալդ Թրամփը հայտարարել է, որ Կիևը «կարող է մոռանալ» ՆԱՏՕ-ին միանալու մասին՝ մինչ պատրաստվում է ուրբաթ օրը Սպիտակ տանն ընդունել Ուկրաինայի նախագահ Վլադիմիր Զելենսկիին, գրում է Newsweek-ը։

Թրամփը նաև մանրամասնել է մոտ ապագայում ՌԴ նախագահ Վլադիմիր Պուտինի հետ հանդիպելու իր ծրագրերը, որի ընթացքում ամերիկացի և ռուս առաջնորդները կփորձեն բանակցել Ուկրաինայի հետ Ռուսաստանի պատերազմի ավարտի մասին։

Կառավարության նիստից հետո լրագրողը Թրամփին հարցրել է, թե ինչ «զիջումներ» կցանկանար տեսնել երեք տարի տևող հակամարտությանը վերջ տալու համար, ինչին Թրամփը պատասխանել է․ «Ես չեմ ուզում ասել հենց հիմա։ Բայց ես կարող եմ ասել, որ ՆԱՏՕ-ի մասին կարող եք մոռանալ: Կարծում եմ՝ հավանաբար դա է պատճառը, որ ամենը սկսվեց»։

Նա նաև հաստատել է, որ Միացյալ Նահանգները վերջնականացրել է հողային ռեսուրսների մասով գործարքը Ուկրաինայի հետ։ Թրամփը նշել է՝ Ուկրաինայի նախագահի այցը կկայանա ուրբաթ, որից հետո համաձայնագիր կստորագրվի «հազվագյուտ մետաղների և այլնի մասին»։

«Ուկրաինայի նախագահ Զելենսկին կժամանի ուրբաթ օրը։ Սա այժմ հաստատված է։ Մենք համաձայնագիր կստորագրենք, և դա կլինի շատ մեծ համաձայնագիր»,- ասել է ԱՄՆ նախագահը։

Միաժամանակ, Թրամփը հայտարարել է, որ մտադիր չէ Ուկրաինային լրացուցիչ անվտանգության երաշխիքներ տալ։

«Ես չեմ պատրաստվում անվտանգության երաշխիքներ տալ եղածից ավելին։ Մենք դա կվստահենք Եվրոպային, քանի որ  Եվրոպան նրանց հարևանն է։ Բայց մենք, իհարկե, հոգ կտանենք, որ ամեն ինչ լավ ընթանա»,- ասել է Թրամփը։

Սպիտակ տան ղեկավարը վստահություն է հայտնել, որ կկարողանա վերջ տալ Ուկրաինայի պատերազմին, նաև ընդգծել, որ ռուսական կողմը պետք է զիջումների գնա բանակցություններում՝ խաղաղության հասնելու համար։

«Մենք կանենք ամեն ինչ, որպեսզի հասնենք գործարքի, որը լավ կլինի երկու կողմերի համար»,- ասել է Թրամփը` վստահեցնելով՝ կփորձի ապահովել, որ համաձայնագիրը «լավ լինի Ուկրաինայի համար»։

Նրա խոսքով՝ ԱՄՆ-ը կփորձի օգնել Ուկրաինային վերադարձնել կորցրած որոշ տարածքներ, թեև «դա դժվար կլինի»։

Թարգմանությունը՝ Էմմա Չոբանյանի