08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
Թրամփի վարչակազմը դադարեցնում է USAID-ի միջոցով արտաքին օգնության ավելի քան 90 տոկոսը
Քաղաքականություն
27.02.2025 | 16:14
Թրամփի վարչակազմը դադարեցնում է ԱՄՆ Միջազգային զարգացման գործակալության (USAID) միջոցով արտասահմանյան օգնության ավելի քան 90%-ը։Այս մասին են վկայում հայցի քննարկման շրջանակում դատարան ուղարկված փաստաթղթերը, գրում է CNN-ը։
«Ընդհանուր առմամբ, դադարեցվել է ԱՄՆ ՄԶԳ շուրջ 5800 դրամաշնորհ, իսկ ավելի քան 500 դրամաշնորհներ պահպանվել են։ Դրանց ընդհանուր առավելագույն արժեքը կազմում է շուրջ 57 միլիարդ դոլար»,- ասվում է փաստաթղթում։
Նշվում է նաև, որ բացի USAID դրամաշնորհների չեղարկումից՝ «դադարեցվել է մոտ 4100 պետական դրամաշնորհ, պահպանվել՝ շուրջ 2700-ը»: 297 ֆինանսավորման որոշում դեռևս պետք է գնահատվի:
Թրամփի վարչակազմը պարզաբանումներ է ներկայացրել դրամաշնորհային ծրագրերի վերաբերյալ դատական հայցի շրջանակում, որը վիճարկում է արտաքին օգնությունը սառեցնելու որոշումը։ Փաստաթղթի համաձայն՝ ԱՄՆ պետքարտուղար Մարկո Ռուբիոն «յուրաքանչյուր ծրագրի վերաբերյալ վերջնական որոշում է կայացրել յուրաքանչյուր դեպքի հիման վրա՝ ընտրելով կա՛մ պահպանել, կա՛մ դադարեցնել այն՝ որպես Միացյալ Նահանգների ազգային շահերին և արտաքին քաղաքականությանը չհամապատասխանող»:
Սակայն հայցվորները հերքել են, որ Ռուբիոն անձամբ է վերանայել դադարեցման բոլոր որոշումները՝ ասելով, որ «անհնար է մեկ անձի կամ նույնիսկ մի խումբ մարդկանց համար իմաստալից կերպով վերանայել այս բոլոր պայմանագրերն ու որոշումները այդքան կարճ ժամանակահատվածում»:
Հիշեցնենք, որ ԱՄՆ նախագահ Դոնալդ Թրամփի վարչակազմի որոշմամբ՝ ամբողջ աշխարհում USAID-ի օգնության ծրագրերը սառեցվել են։
Թարգմանությունը՝ Էմմա Չոբանյանի
