25.05.2026 | 18:33
Գորիսի հիվանդանոցի նախկին տնօրենը մեղադրվում է գույքի ապօրինի օտարման և փողերի լվացման համար․ ՔԿ
ԵՄ-ն ստեղծվել է ԱՄՆ-ին «տապալելու» համար․ Թրամփը խոստացել է 25% մաքսատուրք սահմանել ԵՄ բոլոր ապրանքների ներմուծման համար
Քաղաքականություն
27.02.2025 | 12:08
ԱՄՆ նախագահ Դոնալդ Թրամփը հայտարարել է, որ Եվրամիությունը ստեղծվել է Միացյալ Նահանգներին «խեղդելու» համար և կրկին սպառնացել է նոր՝ 25 տոկոս մաքսատուրքերով, գրում է France 24-ը։
«Եկեք ազնիվ լինենք, ԵՄ-ն ստեղծվել է տապալելու համար։ Դա նրա նպատակն է, և նրանք լավ գործ են արել։ Բայց հիմա ես նախագահ եմ»,- ասել է Թրամփը լրագրողներին։
Կառավարության նիստում նա նշել է, թե Եվրամիությունն օգտվել է ԱՄՆ-ից՝ հավելելով, թե դա «անարդարացի» է։
ԵՄ-ից արագորեն արձագանքել են․ եվրոպացի մի պաշտոնյա հայտարարել է, որ դաշինքն իրականում «լավ բան» է եղել Միացյալ Նահանգների համար:
«Եվրամիությունն աշխարհի ամենամեծ ազատ շուկան է: Եվ դա բարենպաստ էր Միացյալ Նահանգների համար»,- ասել է Եվրահանձնաժողովի աղբյուրը՝ հավելելով, որ ԵՄ-ն «կտրուկ և անհապաղ» կպատասխանի նոր մաքսատուրքերին:
«Մենք պետք է միասին աշխատենք, որպեսզի պահպանենք այդ հնարավորությունները մեր ժողովրդի և բիզնեսի համար, ոչ թե միմյանց դեմ»,- ասել է նա։
Միաժամանակ, հարցին՝ արդյո՞ք Թրամփը որոշում է կայացրել Եվրամիության համար մաքսատուրքերի բարձրացման վերաբերյալ, Սպիտակ տան ղեկավարը պատասխանել է․ «Շատ շուտով կհայտարարենք, ընդհանուր առմամբ, կկազմի 25 տոկոս»։
Հիշեցնենք, որ Թրամփն ավելի վաղ մաքսատուրքեր էր սահմանել ԱՄՆ-ի հարևաններ Կանադայի և Մեքսիկայի, ինչպես նաև մրցակից Չինաստանի նկատմամբ։
Թարգմանությունը՝ Էմմա Չոբանյանի
