Մորուքավոր պարուհիներ, Թրամփի ոսկե արձան, գումար շաղ տվող Մասկ․ Թրամփը ԱԲ-ի ստեղծած՝ Գազայի ապագայի տեսանյութ է հրապարակել

ԱՄՆ նախագահ Դոնալդ Թրամփն իր Truth Social սոցցանցում հրապարակել է արհեստական ​​բանականության գործիքների միջոցով ստեղծված տեսանյութ, որը ցույց է տալիս, թե ինչպիսին է Գազայի մասին իր տեսլականը իր իսկ կողմից ավելի վաղ առաջարկած ծրագրի շրջանակում։ Թրամփն այն հրապարակել է առանց մեկնաբանություն գրելու։

Տեսանյութի սկզբում պատկերված է ավերված Գազան «Գազա 2025։ Ի՞նչն է հաջորդը» գրությամբ։ Այնուհետև դա փոխարինվում է ծաղկուն տարածքի՝ էկզոտիկ լողափերով, երկնաքերերով, շքեղ զբոսանավերով և զվարճացող մարդկանցով։ Տեսանյութում երևում են մորուքավոր պարուհիներ, Իլոն Մասկը, որը լողափում թղթադրամներ է շաղ տալիս, իսկ երեխաները փորձում են հավաքել։

Տեսանյութը ներառում է նաև «Թրամփ Գազա» աշտարակը և ԱՄՆ նախագահի հսկայական ոսկե արձանը, ինչպես նաև դրա փոքր տարբերակները, որոնք վաճառվում են հուշանվերների խանութում:

Տեսանյութում նաև պատկերված է, թե ինչպես է Թրամփը բարում պարում պորտապարուհու հետ, ինչպես նաև արևային լոգանք ընդունում և կոկտեյլ խմում հյուրանոցի լողավազանի մոտ Իսրայելի վարչապետ Բենիամին Նեթանյահուի հետ:

Տեսանյութն ուղեկցվում է երգով, որում ասվում է, որ «Դոնալդը գալիս է ձեզ ազատելու՝ լույս բերելով բոլորին, այլևս թունելներ, վախ չկա։ Թրամփի Գազան վերջապես այստեղ է։ Խնջույք և պար, գործարքը կնքվել է, Թրամփ Գազան համար մեկն է»:

Հիշեցնենք, որ ավելի վաղ Թրամփն առաջարկել էր Գազան հանձնել ԱՄՆ-ի վերահսկողությանը, իսկ պաղեստինցիներին՝ հեռանալ այնտեղից։

Թարգմանությունը՝ էմմա Չոբանյանի