Մեծ Բրիտանիայի վարչապետը հայտարարել է ռազմական ծախսերի ավելացման մասին․ նա մեկնում է Թրամփի հետ հանդիպման

Արձագանքելով գլոբալ քաղաքականության վերջին տեղաշարժերին՝ Մեծ Բրիտանիայի վարչապետ Քիր Սթարմերը հայտարարել է, որ երկրի ռազմական ծախսերն առաջիկա երկու տարիների ընթացքում կհասնեն ՀՆԱ-ի 2,6%-ին: BBC-ի դիվանագիտական վերլուծաբանը նշում է, որ շատերը կարծում են՝ ստեղծված իրավիճակում ռազմական ծախսերի ավելացումը ՀՆԱ-ի ընդամենը 0,3%-ով չափազանց ոչ վճռական քայլ է։

Ելույթ ունենալով Համայնքների պալատում՝ Քիր Սթարմերը հայտարարել է, որ Բրիտանիայի ռազմական ծախսերը մինչև 2027 թվականը կավելանան տարեկան 13,4 միլիարդ ֆունտով կամ ՀՆԱ-ի 2,6%-ով, թեև ռազմական ծախսերի աճը կներառի նաև հետախուզական ծառայությունների ռազմական ծախսերը:

Անցյալ տարի Մեծ Բրիտանիան 53,9 միլիարդ ֆունտ (75 միլիարդ դոլար) է ծախսել իր զինված ուժերի վրա:

Միևնույն ժամանակ, Սթարմերի կառավարությունը կկրճատի արտասահմանում մարդասիրական օգնության ծախսերը, և հենց այդ գումարն է ուղղվելու բանակին և նավատորմին:

Մինչև վերջերս Քիր Սթարմերը և նրա կառավարությունը խոստանում էին ավելացնել ռազմական ծախսերը ՀՆԱ-ի 2,5%-ի չափով մինչև հաջորդ խորհրդարանական ընտրությունները՝ 2029 թվականը։ Սակայն վերջին շաբաթների համաշխարհային քաղաքականության բուռն իրադարձությունները, հատկապես, Ուկրաինայի վերաբերյալ ԱՄՆ նախագահ Դոնալդ Թրամփի հայտարարությունները, ստիպել են Սթարմերին փոխել իր ծրագրերը:

Մեծ Բրիտանիայի վարչապետը չորեքշաբթի մեկնում է Վաշինգտոն։ Անհասկանալի է՝ արդյո՞ք նրա նոր ծրագրերը կտպավորեն ԱՄՆ նախագահին. Դոնալդ Թրամփը, ի թիվս այլ բաների, վերջերս հայտարարել է, որ ՆԱՏՕ-ի եվրոպական երկրները պետք է ՀՆԱ-ի ավելի քան 5%-ը ծախսեն պաշտպանության վրա։

ԱՄՆ պաշտպանության նախարար Փիթ Հեգսեթը բարձր է գնահատել Սթարմերի որոշումը՝ այն անվանելով «վստահելի գործընկերոջ կողմից ուժեղ քայլ»։

Թարգմանությունը՝ Տաթև Ֆռանգյանի