Թուրքիայից հետո Լավրովն այսօր Իրան կայցելի․ քննարկվելու է նաև Հարավային Կովկասում իրավիճակը

ՌԴ ԱԳ նախարար Սերգեյ Լավրովը փետրվարի 25-ին աշխատանքային այցով կմեկնի Իրան, որտեղ կհանդիպի իր իրանցի գործընկեր Աբբաս Արաղչիի հետ։ Այս մասին հայտնում է ՌԴ ԱԳՆ-ն, փոխանցում է ՌԻԱ Նովոստին։

«Փետրվարի 25-ին Իրանի Իսլամական Հանրապետության արտաքին գործերի նախարար Աբբաս Արաղչիի հրավերով ՌԴ ԱԳ նախարար Սերգեյ Լավրովն աշխատանքային այցով կմեկնի Թեհրան։ Արտաքին քաղաքական գերատեսչությունների ղեկավարներն առարկայական կքննարկեն ռուս-իրանական հարաբերությունների երկկողմ օրակարգը, որոնք պաշտոնապես հասել են համապարփակ ռազմավարական գործընկերության մակարդակի՝ հունվարի 17-ին Մոսկվայում նոր հիմնարար միջպետական ​​համաձայնագրի ստորագրմամբ»,- ասվում է հաղորդագրությունում։

Նշվում է, որ բանակցությունների ընթացքում նախատեսվում է հատուկ շեշտադրել փոխշահավետ առևտրատնտեսական համագործակցության հետագա ընդլայնումը՝ էներգետիկայի և տրանսպորտի ոլորտներում առանցքային համատեղ նախագծերի իրականացման համատեքստում։

«Ենթադրվում է մտքերի փոխանակում մի շարք միջազգային արդիական հարցերի շուրջ, այդ թվում՝ իրավիճակը Սիրիայում, Անդրկովկասում, Աֆղանստանում, Եմենում, Պարսից ծոցում, մերձավորարևելյան կարգավորման, կասպյան հիմնախնդրի և Իրանի միջուկային ծրագրի շուրջ Գործողությունների համատեղ համապարփակ ծրագրի շուրջ»,- նշում է ՌԴ ԱԳՆ-ն։

Հավելենք, որ Լավրովը նախօրեին այցով Անկարայում էր, որտեղ բանակցություններ է անցկացրել Թուրքիայի ԱԳ նախարար Հաքան Ֆիդանի հետ։ Նրան ընդունել է նաև երկրի նախագահ Ռեջեփ Թայիփ Էրդողանը։

Թարգմանությունը՝ Էմմա Չոբանյանի