Ադրբեջանի ԱԳ փոխնախարարն արձագանքել է Արարատ Միրզոյանի հայտարարություններին

Ադրբեջանի ԱԳ փոխնախարար Էլնուր Մամեդովը Ժնևում ՄԱԿ-ի Մարդու իրավունքների խորհրդի 56-րդ նստաշրջանի բարձր մակարդակի նիստում արձագանքել է ՀՀ ԱԳ նախարար Արարատ Միրզոյանի՝ Բաքվում ընթացող կեղծ դատավարությունների մասին ավելի վաղ արված հայտարարություններին։

Նա հայտարարել է, թե, իբր, «հետկոնֆլիկտային վերականգնումը պահանջում է հակամարտության բոլոր բացասական հետևանքների վերացում, ինչը, միևնույն ժամանակ, ենթադրում է պատասխանատվության ենթարկել հանցագործություններ կատարելու համար կասկածվողներին»։

«Պատերազմական հանցագործություններ կատարելու համար կասկածվողներին պատասխանատվության ենթարկելը ոչ միայն Ադրբեջանի իրավունքն է, այլև միջազգային իրավունքի պարտավորությունը։ Մենք հոգ ենք տարել, որ մեղադրյալների իրավունքներն ապահովվեն պահանջվող միջազգային չափանիշներին համապատասխան, և մենք շարունակելու ենք այդպես անել»,- ասել է Մամեդովը՝ արձագանքելով Արարատ Միրզոյանի  հայտարարությանը, որ Ադրբեջանում ընթանում են կեղծ դատավարություններ 23 հայ անձանց նկատմամբ, որոնք կամայականորեն են ազատազրկված, ընդ որում՝ անտեսվում են պատշաճ դատավարության համար անհրաժեշտ մարդու իրավունքների չափանիշները։

Բացի այդ, Մամեդովը շարունակել է Հայաստանին տարածքային պահանջներ ներկայացնել ու առաջ քաշել, այսպես կոչված, «Արևմտյան Ադրբեջան» համայնքի ադրբեջանական թեզը՝ նշելով, թե, իբր, «Հայաստանից վտարված ավելի քան 250 հազար ադրբեջանցիների անվտանգ և արժանապատիվ վերադարձի ապահովումը կարևոր է»։

«Այդ ջանքերը Հայաստանի կառավարության կողմից միտումնավոր սխալ մեկնաբանվում են որպես տարածքային պահանջներ Ադրբեջանի կողմից: Սա այն խնդիրն է, որը մեզ հուզում է, և որը պետք է պատշաճ կերպով դիտարկեն ՄԱԿ-ի մեխանիզմները»,- հայտարարել է ադրբեջանցի պաշտոնյան։

Թարգմանությունը՝ Էմմա Չոբանյանի