Քաղաքականություն
28.09.2018 | 12:46Այսօր խնդիր ունեն բոլոր հեռուստաընկերությունները, և այդ խնդիրը, իհարկե, համացանցի, սոցցանցերի տարածումն ու զարգացումն է:
«Հանրային հեռուստաընկերության դերը նոր Հայաստանի կայացման գործում» թեմայով քննարկման ժամանակ ասաց Հանրային հեռուստառադիոընկերության խորհրդի անդամ Ստեփան Զաքարյանը:
Նրա խոսքով՝ հարկավոր է շատ բան փոխել հեռուստատեսությունների աշխատաոճի մեջ. «Եթե առաջ շատերը լուրերն իմանում էին հեռուստատեսությունից, հիմա, վստահ եմ, բոլորը լուրերն իմանում են շատ ավելի վաղ, քան գալիս է հեռուստաընկերության լրատվական թողարկման ժամը: Այստեղ շատ է կարևորվում, թե ինչ ձևով է այդ լուրը հաղորդվում, և շատ են կարևորվում վերլուծական հաղորդումները, որովհետև լրատվությունը գնալով ինչ-որ առումով հնանում է»:
Ըստ Ստեփան Զաքարյանի՝ Հանրային հեռուստատեսությունն ինչ-որ առումով հակասության մեջ է. պարտավոր է պատրաստել հաղորդումներ, որ մյուսները չեն պատրաստում, բայց այդ հաղորդումները վարկանիշ չեն բերում:
«Բայց ո՞ւմ է պետք հեռուստատեսությունը, որը ոչ ոք չի նայում: Եվ այս պայքարը գնացել է տարիների ընթացքում. Հանրայինը պիտի պայքարի՞ վարկանիշի համար, թե՞ ոչ: Եթե հիշում եք՝ առաջ, Ռոբերտ Քոչարյանի ժամանակ, ցուցում էր տված Հանրայինին՝ լինել առաջինը, որ լրատվությունը բոլորը նայեն: Դա շատ կարեւոր էր, որովհետև այն ծայրից ծայր քարոզչություն էր: Բայց վարկանիշի խնդիրն այսօր էլ կա, որովհետև եթե մենք ունենք պարտավորություն կրթել ժողովրդին՝ նաև մշակութային հաղորդումներով, պիտի այնպես անենք, որ այդ հաղորդումները նայեն»,- նշեց Զաքարյանը:
Մանրամասները՝ տեսանյութում
