17.07.2026 | 21:00
ՔՆՆԱՐԿՈւՄ․ Իսպանիա vs Արգենտինա․ Ֆուտբոլային մեծ բախում՝ Աշխարհի չեմպիոնի գավաթի համար․ ո՞ր թիմը կհաղթի․ ՏԵՍԱՆՅՈՒԹ
Ստամբուլի ընդդիմադիր քաղաքապետի «կեղծ» դիպլոմի հետաքննության շրջանակում Թուրքիայում 11,000 դիպլոմ է քննվում
Քաղաքականություն
24.02.2025 | 23:29
Ստամբուլի ընդդիմադիր քաղաքապետ Էքրեմ Իմամօղլուի, իբր, կեղծ դիպլոմի մասին պնդումներից հետո հետաքննություն է սկսվել։ Լրագրող Բարըշ Յարքադաշը բացահայտել է, որ Բարձրագույն կրթության խորհուրդը (YOK) վերանայում է, ընդհանուր առմամբ, ավելի քան 11,000 դիպլոմ, գրում է Haber-ը։
Իմամօղլուն ավարտել է Տրապիզոնի միջնակարգ դպրոցը, այնուհետև ընդունվել Արևելյան միջերկրածովյան համալսարանի (EMU) Քաղաքացիական ճարտարագիտության ֆակուլտետը։ Հետագայում նա տեղափոխվել է Հյուսիսային Կիպրոսի Գիրնե ամերիկյան համալսարանի տնտեսագիտության ֆակուլտետ։
1994 թվականին Իմամօղլուն փոխադրվել է Ստամբուլ և սկսել սովորել Ստամբուլի համալսարանում, որն այն ժամանակ հինգ մատչելի բուհերից մեկն էր: Իմամօղլուն ավարտել է համալսարանը 1994 թվականին, սակայն նրա դիպլոմի հետ կապված հակասություններ կան, քանի որ YOK-ն այն ժամանակ չէր ճանաչում Գիրնեի ամերիկյան համալսարանը, ինչը նրա դիպլոմը պոտենցիալ անվավեր էր դարձնում:
YOK-ը սկսել է 1989-2001 թվականներին թվագրվող դիպլոմների համապարփակ վերանայում: Այս գործընթացում 11,000 դիպլոմներ գտնվում են հսկողության տակ, այդ թվում՝ այն մարդկանց, որոնք միջնակարգ դպրոցն ավարտել են արտասահմանում և հետագայում ընդունվել համալսարաններ: YOK-ը հատուկ ուշադրություն է դարձնում Հյուսիսային Կիպրոսի դիպլոմներին, որտեղ կրթական համակարգը հետևում է բրիտանական համակարգին։
Սպասվում էր, որ Իմամօղլուն պետք է ցուցմունք տա փետրվարի 26-ին, նա միջնորդություն է ներկայացրել դատարան մարտի 5-ին ցուցմունք տալու մասին, ինչը բավարարվել է։ Նրա ցուցմունքներից հետո, եթե դատախազը բավարար ապացույցներ գտնի, կարող է գործ հարուցվել։
YOK-ի զեկույցը վճռորոշ կլինի՝ որոշելու՝ արդյո՞ք իրավական գործողություններ կձեռնարկվեն: Վերջնական որոշումը կախված կլինի նրանից՝ արդյո՞ք դատարանը կընդունի զեկույցը և թույլ կտա հայց ներկայացնել։
Ըստ հրապարակման՝ այս հետաքննությունը տարածվում է կրթական տարբեր համակարգերի վրա և կենտրոնանում է, մասնավորապես, Հյուսիային Կիպրոսից Թուրքիայի համալսարաններ տեղափոխվող ուսանողների ուղղությամբ։ Քննարկումը շոշափում է նաև ոչ թուրքական բուհեր ավարտած ուսանողների ակադեմիական վավերականության հարցերը։
Ուշագրավ է, որ այս հետաքննությունը սկսվել է այն բանից հետո, երբ Իմամօղլուն դիմում է ներկայացրել իր թեկնածությունը գլխավոր ընդդիմադիր Ժողովրդահանրապետական կուսակցության նախնական ընտրություններում երկրի նախագահի թեկնածու առաջադրվելու համար։
Թարգմանությունը՝ Էմմա Չոբանյանի
