30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Ստամբուլի ընդդիմադիր քաղաքապետը նախագահի թեկնածության հայտ է ներկայացրել․ նա Էրդողանի հիմնական մրցակիցն է համարվում
Քաղաքականություն
21.02.2025 | 17:22
Ստամբուլի ընդդիմադիր քաղաքապետ Էքրեմ Իմամօղլուն դիմում է ներկայացրել՝ Ժողովրդահանրապետական կուսակցության (CHP) նախնական ընտրություններում երկրի նախագահի թեկնածու առաջադրվելու համար, գրում է Birgun-ը։
Իմամօղլուի փաստաբան Մեհմեդ Փեհլիվանը թեկնածության դիմումի փաստաթղթերը ներկայացրել է CHP-ի ընտրությունների և ներքին կուսակցության իրավական հարցերի պատասխանատուի տեղակալ Գյուլ Չիֆթչիին։
«Այսօր ես կատարեցի նոր սկզբի առաջին քայլը և պաշտոնական դիմում ներկայացրեցի՝ լինելու Ժողավրդահանրապետական կուսակցությունից նախագահի թեկնածու, որի անդամ լինելն ինձ համար պատիվ է։ Մենք ճամփորդության ենք մեկնում մեր ազգի հետ, որն արժանի է մարդավայել ապրելու և ձգտում է ազատության, արդարության, բարգավաճման և միասնության»,-գրել է Իմամօղլուն X-ի իր միկրոբլոգում։
Նա նշել է, որ ճանապարհ են ընկնում՝ Թուրքիան դարձնելու ժողովրդավարական և ուժեղ, հարուստ և խաղաղ, իսկ քաղաքացիներին՝ հավասար ու ազատ:
«Մենք հնարավորինս արագ կներդնենք խորհրդարանական ժողովրդավարություն, իշխանությունների տարանջատում և հակակշիռներ։ Մենք առաջնահերթություն ենք տալու ժողովրդավարական մասնակցությանը։ Մենք կփարատենք մեր ազգի հոգսերն ու տագնապները, և միասին կվերածնենք ապագայի հույսն ու երազանքները։ Մենք բոլորս միասին պաշտպանելու ենք մեր երկիրը, միասնությունը, համերաշխությունը և հզոր Թուրքիայի նպատակը»,- գրել է Ստամբուլի քաղաքապետը;
Ըստ փորձագետների՝ Իմամօղլուն Թուրքիայի նախագահ Ռեջեփ Թայիփ Էրդողանի ամենաուժեղ քաղաքական մրցակիցն է առաջիկա ընտրություններում։ Հաջորդ նախագահական և խորհրդարանական ընտրությունները Թուրքիայում նախատեսվում է անցկացնել 2028 թվականին, սակայն վերջին շրջանում ընդդիմությունը հաճախ է խոսում արտահերթ ընտրությունների անցկացման մասին։
Հիշեցնենք, որ ավելի վաղ CHP-ի առաջնորդ Օզգյուր Օզելը հայտարարել էր, որ մարտի 23-ին կուսակցության փրայմերիզ կանցկացնեն և կորոշեն նախագահի թեկնածուին։
Թարգմանությունը՝ Էմմա Չոբանյանի
