Թուրքիայի գլխավոր ընդդիմադիր կուսակցությունը մարտին կորոշի երկրի նախագահի իր թեկնածուին

Թուրքիայի գլխավոր ընդդիմադիր Ժողովրդահանրապետական ​​կուսակցությունը (CHP) ուժեղացնում է ճնշումը կառավարության վրա՝ արտահերթ ընտրություններ անցկացնելու համար։ Մասնավորապես, կուսակցության առաջնորդ Օզգյուր Օզելը հայտարարել  է, որ մարտի 23-ին կուսակցության փրայմերիզ կանցկացնեն և կորոշեն նախագահի թեկնածուին, գրում է Duvar-ը։

Ելույթ ունենալով կուսակցության խորհրդարանական խմբի նիստում՝ Օզելը հայտարարել է, որ նախնական օրը մարտի 23-ն է, երբ կարող են քվեարկել CHP-ի բոլոր անդամները: Նա նշել է, որ Անկարայի քաղաքապետ Մանսուր Յավաշը չի մասնակցի նախնական ընտրություններին:

«Մենք քննարկել և համաձայնության ենք եկել այն պահանջի և առաջարկի շուրջ, որ Թուրքիային հույս տվող երկու անունները չպետք է մաշեն միմյանց՝ մրցելով փրայմերիզում»,- ասել է Օզելը։

Ակնկալվում է, որ Ստամբուլի քաղաքապետ Էքրեմ Իմամօղլուն կհայտարարվի կուսակցության նախագահի թեկնածու։ Իսկ մինչ այդ, նա բախվում է կառավարության կողմից հետաքննությունների միջոցով աճող ճնշմանը։

«Մենք միասնական ենք և միասին (որպես RNP), որպեսզի մեր երկիրը լավ օրեր ունենա, որպեսզի թոշակառուները, նվազագույն աշխատավարձ ստացողները, ուսանողները, աշխատողները կարողանան հարմարավետ ապրել և վերականգնվի խորհրդարանական ժողովրդավարությունը»,- սոցցանցում գրել է Անկարայի քաղաքապետ Մանսուր Յավաշը։

Խորհրդարանական և նախագահական ընտրությունները նախատեսված են 2028 թվականին, սակայն ընդդիմադիր CHP-ն ուժեղացնում է իր ճնշումը արտահերթ ընտրությունների անցկացման համար, քանի որ բախվում է դատական ​​հետաքննության միջոցով բռնաճնշումների նոր ալիքի։

«Ընտրական խորհուրդը չի սկսում ընտրական գործընթացը, ազգն է այն սկսում, ազգի ընտրական գործընթացն արդեն սկսվել է։ Իհարկե, մենք արտահերթ ընտրություններ ենք ուզում։ Եթե մենք ուզում ենք արտահերթ ընտրություններ, մենք պարտավորություններ ունենք»,- ասել է Օզելը։

Թարգմանությունը՝ Էմմա Չոբանյանի