08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Մակրոնը հայտարարել է, որ Ֆրանսիան «վաղը» զորքեր չի ուղարկի Ուկրաինա, բայց կարող է անվտանգության երաշխիքներ տալ
Քաղաքականություն
21.02.2025 | 12:34
Ֆրանսիայի նախագահ Էմանուել Մակրոնը հայտարարել է, որ չի ծրագրում «վաղը» զորքեր ուղարկել Ուկրաինա, սակայն Փարիզը դիտարկում է Ուկրաինային անվտանգության երաշխիքներ տրամադրելու հարցը՝ Ռուսաստանի հետ հրադադարի վերջնական համաձայնությունից հետո, գրում է France 24-ը։
«Ես չեմ որոշել վաղը զորք ուղարկել Ուկրաինա, ոչ։ Այն, ինչ մենք քննարկում ենք դրա փոխարեն, ուժեր ուղարկելն է՝ խաղաղությունը երաշխավորելու համար, երբ այն ձեռք բերվի»,- ասել է նա։
Պատասխանելով սոցցանցերի ֆրանսիացի օգտատերերի հարցերին հաջորդ շաբաթ Սպիտակ տուն ծրագրված այցից առաջ՝ Մակրոնն ասել է, որ Ֆրանսիան թևակոխում է «նոր դարաշրջան», և որ ինքը ծրագրում է ԱՄՆ նախագահ Դոնալդ Թրամփին ասել, որ չի կարող «թույլ լինել» իր ռուս գործընկեր Վլադիմիր Պուտինի հետ։
«Ես պատրաստվում եմ ասել նրա՝ դուք չեք կարող թույլ լինել նախագահ Պուտինի հետ։ Դա ձեր ապրանքանիշը չէ, սա ձեր շահերից չի բխում»,- ասել է Ֆրասիայի նախագահը։
Սպիտակ տնից հայտնել են, որ Թրամփը երկուշաբթի Վաշինգտոնում հանդիպելու է Մակրոնի, իսկ հինգշաբթի՝ Մեծ Բրիտանիայի վարչապետ Քիր Սթարմերի հետ։
Այս շաբաթվա սկզբին Մակրոնը լրագրողներին ասել էր, որ «Ռուսաստանը գոյաբանական սպառնալիք է ներկայացնում եվրոպացիների համար»: Նախօրեին էլ Ֆրանսիայի նախագահն ասել է, որ Փարիզը պետք է ուժեղացնի անվտանգությունը ԱՄՆ-Ռուսաստան հարաբերություններում քաղաքական շոկային փոփոխության պայմաններում:
«Ես համոզված եմ, որ մենք թևակոխում ենք նոր դարաշրջան, դա մեզ ընտրություն է պարտադրելու։ Մենք՝ եվրոպացիներս, պետք է մեծացնենք մեր ռազմական ջանքերը»,- հավելել է Մակրոնը։
Թարգմանությունը՝ Էմմա Չոբանյանի
