25.05.2026 | 18:33
Գորիսի հիվանդանոցի նախկին տնօրենը մեղադրվում է գույքի ապօրինի օտարման և փողերի լվացման համար․ ՔԿ
Պուտին-Թրամփ հանդիպումը կախված է Ուկրաինայի բանակցությունների առաջընթացից․ Ռուբիո
Քաղաքականություն
21.02.2025 | 11:27
Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի հանդիպումը պետք է լինի առարկայական ու կախված լինի ուկրաինական հակամարտության շուրջ բանակցություններում առաջընթացից, հայտարարել է ԱՄՆ պետքարտուղար Մարկո Ռուբիոն։
Նա նշել է, որ չնայած երկու երկրների միջև հնարավոր համագործակցության ոլորտներին՝ ուկրաինական ճգնաժամը շարունակում է մնալ հարաբերությունները բարդացնող հիմնական գործոնը։
«Ոչ մի հանդիպում չի լինի, քանի դեռ չգիտենք, թե ինչի մասին է այն լինելու»,- ասել է Ռուբիոն լրագրող Քեթրին Հերիջի հետ հարցազրույցում, որը հրապարակվել է նրա X-ի միկրոբլոգում։
Պետքարտուղարը նաև մտահոգություն է հայտնել Մոսկվայի ու Վաշինգտոնի միջև ԱՄՆ նախկին նախագահ Ջո Բայդենի վարչակազմի ժամանակ կապերի կորստի կապակցությամբ։ Նրա խոսքով՝ նույնիսկ Սառը պատերազմի տարիներին ԽՍՀՄ-ի և ԱՄՆ-ի միջև պահպանվել են կապի ուղիներ, որոնք այժմ գրեթե չեն գործում։
Մեկնաբանելով Ռուսաստանի և ԱՄՆ-ի պատվիրակությունների միջև վերջին բանակցությունները՝ նա նշել է, որ հանդիպմանը տարածքային հարցեր չեն քննարկվել։
«Հանդիպման նպատակն էր պարզել՝ կա՞ իրական շահագրգռվածություն խաղաղության քննարկման հարցում, թե՞ ոչ»,- հավելել է պետքարտուղարը։
Ավելի վաղ Դոնալդ Թրամփը չէր բացառել ռուս գործընկերոջ հետ մինչև այս ամսվա վերջ հանդիպելու հավանականությունը։
Թարգմանությունը՝ Տաթև Ֆռանգյանի
