08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
ԱՄՆ-ն Ուկրաինային է փոխանցել օգտակար հանածոների վերաբերյալ գործարքի նոր տարբերակը․ Axios
Քաղաքականություն
21.02.2025 | 12:10
ԱՄՆ վարչակազմը Կիև է ուղարկել Ուկրաինայում օգտակար հանածոների մասին համաձայնագրի «բարելավված» տարբերակը։ Նախագահ Վլադիմիր Զելենսկիի խորհրդականները խորհուրդ են տվել համաձայնել առաջարկին, հայտնում է Axios-ը։
Պարբերականի աղբյուրները պնդում են, որ «գործարքն այժմ ավելի հավանական է թվում»։ Զրուցակիցներից մեկի խոսքով՝ փաստաթուղթը «ներառում է զգալի բարելավումներ» և «համապատասխանում է Ուկրաինայի օրենսդրությանը»։ Այժմ համաձայնագիրը «հաշվի է առնում Զելենսկիի որոշ մտահոգություններ»։ Մասնավորապես, դրանից հանվել է մի կետ, որը գործարքը կենթարկեր Նյու Յորքի դատարանի իրավասությանը։ Այլ մանրամասներ չեն հաղորդվում:
Նշվում է, որ Զելենսկիի խորհրդականներից մի քանիսը նրան խորհուրդ են տվել ստորագրել նորացված փաստաթուղթը՝ ԱՄՆ նախագահ Դոնալդ Թրամփի հետ «նոր կոնֆլիկտներից խուսափելու» և Ուկրաինային իր աջակցությունը հիմնավորելու հնարավորություն տալու համար։
Ուկրաինական հազվագյուտ հողային մետաղների համատեղ մշակման առաջարկը հնչեցրել է անձամբ Վլադիմիր Զելենսկին 2024 թվականի հոկտեմբերին։ ԱՄՆ-ը երկու անգամ փորձել է համաձայնագրի նախագիծ ներկայացնել Ուկրաինային՝ ֆինանսների նախարար Սքոթ Բեսենթի՝ Կիև կատարած այցի ժամանակ և Մյունխենի անվտանգության համաժողովի շրջանակում:
Ենթադրվում էր, որ Վաշինգտոնը կստանա Կիևի կողմից իր հողային ռեսուրսների զարգացումից եկամտի 50%-ը, ինչպես նաև այդ զարգացումների համար երրորդ անձանց տրված լիցենզիաների 50%-ը։
Թարգմանությունը՝ Տաթև Ֆռանգյանի
