Քաղաքականություն
20.02.2025 | 17:42
Մեծ Բրիտանիայի վարչապետ Քիր Սթարմերը ԱՄՆ նախագահ Դոնալդ Թրամփին կներկայացնի Ուկրաինա մինչև 30 հազար եվրոպացի զինվորական ուղարկելու ծրագիրը։ Այս մասին գրում է Telegraph-ը, որին վկայակոչում է BBC-ի ռուսական ծառայությունը։
Ակնկալվում է, որ հաջորդ շաբաթ Թրամփի հետ հանդիպմանը նա մանրամասն կպատմի, թե ինչպես կարող են եվրոպական զորքերն ապահովել հրադադարը, որը կարող է կնքվել Վաշինգտոնի միջնորդությամբ։
Ըստ ծրագրերին ծանոթ արևմտյան պաշտոնյաների՝ նա պնդելու է, որ ամերիկյան կործանիչներն ու հրթիռները Արևելյան Եվրոպայում պատրաստի վիճակում լինեն, եթե Ռուսաստանը խախտի հրադադարի ռեժիմը։
Ըստ Telegraph-ի՝ «անվտանգության ուժեր» ստեղծելու ծրագիրը ներկայացվել է այս շաբաթ Փարիզում եվրոպացի առաջնորդների արտակարգ գագաթնաժողովում։
Գագաթնաժողովից առաջ Սթարմերն ասել էր, որ Բրիտանիան պատրաստ է զորքեր ուղարկել Ուկրաինա՝ անհրաժեշտության դեպքում խաղաղությունն ապահովելու համար, սակայն ԵՄ որոշ երկրներ, այդ թվում՝ Գերմանիան, Լեհաստանը և Իսպանիան, հայտարարել են, որ չեն ցանկանում խաղաղապահներ ուղարկել Ուկրաինա:
Թարգմանությունը՝ Էմմա Չոբանյանի
