22.06.2026 | 10:07
ՀՀ տարածքում ավտոճանապարհներն անցանելի են
Իրանի խորհրդարանի խոսնակը հայտարարել է «3+3» հարթակին Թեհրանի լիակատար աջակցության մասին
Քաղաքականություն
20.02.2025 | 12:08
Ադրբեջանի Միլլի Մեջլիսի նախագահ Սահիբա Գաֆարովան ընդունել է Իրանի խորհրդարանի նախագահ Մոհամմադ Բաղեր Ղալիբաֆին, որը այցով Բաքվում Ասիական խորհրդարանական վեհաժողովի 15-րդ լիագումար նիստին մասնակցելու նպատակով։ Ադրբեջանական կողմի հաղորդմամբ՝ հանդիպմանը նշվել է, որ սա Մոհամմադ Ղալիբաֆի առաջին այցն է Ադրբեջան և այն կնպաստի երկու երկրների հարաբերությունների զարգացմանը։
Գաֆարովան խոսել է Ադրբեջանի արտաքին քաղաքականության սկզբունքների վերաբերյալ երկրի նախագահ Իլհամ Ալիևի տեսակետների մասին՝ ասելով, որ դրանք են՝ «բարեկամությունը, միմյանց ներքին գործերին չմիջամտելը, միջազգային պարտավորություններին հավատարմությունը և փոխադարձ հարգանքը»։
Ղալիբաֆն էլ ասել է, որ Իրանը շահագրգռված է զարգացնել հարաբերությունները բոլոր հարևան պետությունների հետ, և որ Ադրբեջանն առանձնահատուկ տեղ է զբաղեցնում այդ քաղաքականության մեջ։
Զրույցի ընթացքում քննարկվել են նաև Հարավային Կովկասի տարածաշրջանում առկա նոր հնարավորություններն ու հեռանկարները։ Այս առումով նշվել է «3+3» համագործակցության ձևաչափի կարևորությունը։ Ըստ ադրբեջանական կողմի՝ նշվել է, թե տարածաշրջանից դուրս օտար ուժերի ներգրավումը լավ բան չի խոստանում։
Ղալիբաֆը նաև հայտնել է Իրանի լիակատար աջակցությունը «3+3» հարթակին և վստահություն հայտնել, որ այս ձևաչափը կնպաստի տարածաշրջանում խաղաղությանն ու կայունությանը, ինչպես նաև քաղաքական և տնտեսական համագործակցության զարգացմանը։ Նշվել է, որ անընդունելի է տարածաշրջանից դուրս երկրների ներգրավվածությունը։
Թարգմանությունը՝ Էմմա Չոբանյանի
