18.12.2025 | 23:09
Գիտությունն ավելի հաճախ պետք է կապվի արդյունաբերության հետ, որպեսզի արդյունավետությունը հնարավոր լինի չափել. Հակոբ Արշակյան
Ղազախստանը ադրբեջանական օդանավի աղետի հետաքննությունը նախատեսում է ավարտել մինչև դեկտեմբեր
Քաղաքականություն
19.02.2025 | 13:20
Ղազախստանի տրանսպորտի փոխնախարար Թալգաթ Լաստաևը հայտնել է 2024 թվականի դեկտեմբերին Ակտաուի մերձակայքում «Ադրբեջանական ավիաուղիների» (AZAL) ինքնաթիռի կործանման պատճառների հետաքննության ավարտի վերջնաժամկետը, հաղորդում է Tengrinews.kz-ը:
«ԻԿԱՕ-ի կողմից առաջարկված պահանջների և ստանդարտների համաձայն՝ հետաքննությունը տևում է 1 տարի։ Ըստ այդմ, հետաքննության վերջնական զեկույցը պետք է ավարտվի մինչև այս տարվա դեկտեմբեր»,- ասել է Լաստաևը։
Նա նշել է, որ նախօրեին Աբու Դաբիում ԻԿԱՕ-ի գլխավոր քարտուղարի և նախագահի հետ հանդիպումների ժամանակ դրական գնահատական է տրվել նախաքննության զեկույցին։
«Նրանք բարձր են գնահատել Ղազախստանի կողմից հրապարակված նախնական զեկույցի մակարդակն ու որակը՝ նշելով փաստերի հստակ ներկայացումը, մանրամասնությունը և տեղեկատվության ամբողջականությունը»,- նշել է պաշտոնյան։
Միաժամանակ, Լաստաևը չի մեկնաբանել ավիավթարի հետ կապված քրեական գործի հետաքննության ընթացքը։
«Հետաքննությունն արդեն դատախազության իրավասությունն է, կա օպերատիվ քննչական խումբ, որն անմիջականորեն զբաղվում է այս հարցով»,- ասել է պաշտոնյան։
Հիշեցնենք, որ ավելի վաղ Ղազախստանի Տրանսպորտի նախարարությունը հրապարակել էր Ակտաուի մերձակայքում «Ադրբեջանական ավիաուղիներին» (AZAL) պատկանող Embraer 190 ինքնաթիռի կործանման վերաբերյալ նախնական զեկույցը։
Բաքուն էլ շարունակում է պնդել, որ օդանավը խոցվել է ՌԴ-ի կողմից «Պանցիր-Ս» համակարգով՝ հայտարարելով, թե հրթիռի բեկորն իր տրամադրության տակ է։ Բացի այդ, Ադրբեջանի իշխանամերձ լրատվամիջոցները հայտնել են, որ Բաքուն նախապատրաստական աշխատանքներ է տանում և պատրաստվում է ՌԴ-ի դեմ օդանավի կործանման գործով հայց ներկայացնել միջազգային դատարան։
Թարգմանությունը՝ Էմմա Չոբանյանի
