13.03.2026 | 13:50
Մի խումբ ցեղասպանագետներ մտահոգություն են հայտնել Էդիտա Գզոյանի՝ աշխատանքից հեռացման կապակցությամբ
Ստամբուլի քաղաքապետի գործի շրջանակում Թուրքիայում ընդդիմադիր լրատվամիջոցի լրագրողներին մինչև 14 տարվա ազատազրկում է սպառնում
Քաղաքականություն
19.02.2025 | 19:18
Թուրք դատախազները մինչև 14 տարվա ազատազրկում են պահանջում ընդդիմադիր Halk հեռուստաընկերության լրագրողների և ղեկավարների համար՝ դատարանի կողմից նշանակված փորձագետի հետ հարցազրույցը հեռարձակելու համար, որը մեղադրվում է հիմնական ընդդիմադիր կուսակցության դեմ կողմնակալության մեջ, գրում է Turkish Minute-ը։
Ստամբուլի գլխավոր դատախազությունը հետաքննություն է սկսել Halk TV-ի նկատմամբ անցած ամիս այն բանից հետո, երբ հեռարձակվել է լրագրող Բարըշ Փեհլիվանի և փորձագետ Սաթըլմըշ Բույուքչանայակինի հեռախոսազրույցը։ Անցյալ ամիս Ստամբուլի քաղաքապետ Էքրեմ Իմամօղլուն Բյույուքչանայակինին մեղադրել էր կողմնակալության մեջ՝ ասելով, որ կառավարությունն «ընտրել է» նրան՝ զեկույցներ պատրաստելու Ստամբուլում գլխավոր ընդդիմադիր Ժողովրդահանրապետական կուսակցության (CHP) և նրա քաղաքապետերի, այդ թվում՝ իր դեմ, որպեսզի ազդի դատավարությունների վրա։
Փեհլիվանը կապ էր հաստատել Բյույուքչանայակինի հետ՝ պատասխան ստանալու համար, նրանց զրույցը հետագայում հեռարձակվել է Halk TV-ով։
Հեռարձակումը հարուցել է քրեական հետաքննություն, ինչի արդյունքում ձերբակալվել են Փեհլիվանը, հաղորդավար Սեդա Սելեքը, լրատվական տնօրեն Սերհան Ասքերը, գլխավոր խմբագիր Սուաթ Թոքթաշը և ծրագրի համակարգող Քյուրշադ Օղուզը։
Ավելի ուշ Թոքթաշը կալանավորվել է քրեական դատարանի կողմից, իսկ մյուսներն ազատ են արձակվել դատական հսկողության ներքո։
Մեղադրական եզրակացությունը պահանջում է 6-ից 14 տարվա ազատազրկում Փեհլիվանի և Օղուզի համար՝ «գաղտնի խոսակցություններ ձայնագրելու», «դատական պաշտոնյաների վրա ազդելու փորձի» և «ձայնագրված խոսակցությունները մամուլի միջոցով հրապարակելու» մեղադրանքներով։ Դատախազները պահանջում են նաև 4-ից 9 տարվա ազատազրկում Թոքթաշի, Սելեքի և Ասկերի համար՝ «մամուլով ձայնագրված խոսակցությունները հրապարակելու» և «դատական պաշտոնյաների վրա ազդելու փորձի» մեղադրանքով:
Այս ամենը տեղի է ունենում Իմամօղլուի վրա աճող իրավական ճնշման ֆոնին, որը լայնորեն համարվում է նախագահ Ռեջեփ Թայիփ Էրդողանի պոտենցիալ մրցակիցը 2028 թվականի նախագահական ընտրություններում: Ստամբուլի քաղաքապետը բախվում է բազմաթիվ իրավական մարտահրավերների, այդ թվում՝ բողոքարկում 2 տարի 7 ամիս ժամկետով ազատազրկման դեմ, որը կարող է նրան զրկել պաշտոնից, եթե մեղադրանքը հաստատվի:
Ընդդիմության առաջնորդները կառավարությանը մեղադրում են դատական համակարգը Էրդողանի քաղաքական մրցակիցներին լռեցնելու համար, իսկ CHP-ի ղեկավար Օզգուր Օզելը Halk TV-ի հետաքննությունն անվանել է «կառավարության պատերազմի շարունակություն ընդդիմության ձայների դեմ»:
Բացի այդ, Թուրքիայի ԶԼՄ-ների վերահսկող մարմինը՝ Ռադիոյի և հեռուստատեսության բարձրագույն խորհուրդը (RTÜK), տուգանք է սահմանել Halk TV-ի նկատմամբ Փեհլիվանի հարցազրույցը հեռարձակելու համար։ Ցանցը դատապարտել է տուգանքը՝ այն անվանելով «անկախ լրագրությունը ճնշելու ջանքեր»։
Թարգմանությունը՝ Էմմա Չոբանյանի
