Օջալանն աշխատում է թուրք-քրդական խաղաղության ծրագրի ուղղությամբ․ Թուրքիայի քրդամետ կուսակցության պատվիրակները հանդիպել են Իրաքյան Քուրդիստանի առաջնորդներին

Քրդերի բանտարկված առաջնորդ Աբդուլլահ Օջալանն աշխատում է Թուրքիայի և քուրդ զինյալների միջև չորս տասնամյակ տևած հակամարտության «ժողովրդավարական» կարգավորման ուղղությամբ: Այս մասին հայտարարել քրդամետ կուսակցության պատվիրակության անդամը Էրբիլում բանակցությունների ավարտից հետո, գրում է Al Arabiya՝-ն վկայակոչելով AFP-ին։

Հիմնական քրդամետ DEM կուսակցության պատվիրակությունը վերջին շաբաթների ընթացքում երկու անգամ այցելել է Օջալանին, այնուհետև բանակցություններ վարել Թուրքիայի հիմնական խորհրդարանական խմբակցությունների հետ՝ նախքան Իրաք մեկնելը: Իրաքում գտնվող պատվիրակությունը, որի կազմում ընդգրկված էին DEM-ի երկու պատգամավորներ, ինչպես նաև Թուրքիայի խորհրդարանում երկու տեղ ունեցող Դեմոկրատական ​​շրջաններ կուսակցությունից (DBP) Քեսքին Բայնդիրը, Էրբիլում հանդիպել է Քուրդիստանի տարածաշրջանային նախագահ Նեչիրվան Բարզանիի հետ:

«Պարոն Օջալանը քրտնաջան աշխատում է՝ գտնելու գործընթաց, որը կարող է հանգեցնել լուծման՝ չնայած դժվարին պայմաններին։ Նա աշխատում է այս հարցը պատերազմի և հակամարտությունների դաշտից հեռացնելու և հակամարտությունը լուծելու համար ժողովրդավարական և իրավական գործընթաց հաստատելու ուղղությամբ։Այս ճանապարհային քարտեզը նաև կկանգնեցնի ճգնաժամերը Մերձավոր Արևելքում»,- հանդիպումից հետո լրագրողներին ասել է Բայնդիրը։

Թեև Օջալանի ծրագրի ներկայացման ժամկետներ չեն նշվում, քուրդ քաղաքական գործիչները վստահ են, որ դա կլինի շուտով, և ոչ ուշ, քան մարտին՝ մինչև Նովրուզը:

Երեքշաբթի պատվիրակությունը բանակցություններ կանցկացնի Սուլեյմանիայում։

Հավելենք, որ Թուրքիայի քրդամետ կուսակցության պատվիրակությունը հանդիպել է նաև Քուրդիստանի դեմոկրատական ​​կուսակցության (ՔԴԿ) նախագահ Մասուդ Բարզանիի հետ։

Ավելի  վաղ թուրքական լրատվամիջոցները հայտնել էին, որ Օջալանը կարող է դիմել իր կողմնակիցներին՝ զենքերը վայր դնելու և Թուրքիայի հետ երկարամյա զինված առճակատումը դադարեցնելու կոչով։

Թարգմանությունը՝ Էմմա Չոբանյանի