Այդքան կրիմինալ է քարոզվում մեր ֆիլմերում, բայց եռագույնը դրանցում չկա, ցո´ւյց տվեք. Աշոտ Տեր-Մաթևոսյան. ՏԵՍԱՆՅՈՒԹ

«Եղել է, որ նստացույցի ժամանակ սունդուկյանցիները մոտեցել, նստել են մեր կողքին, դե, մեր գլխավերևում տեսախցիկներ կային, Սունդուկյան թատրոնի տնօրենը ֆիքսել է, այդ մարդկանց կանչել մոտն ու նկատողություն տվել, ասել` ինչու եք իրենց ջրաղացին ջուր լցնում: Այսինքն`ազատ խոսքի արտահայտման իրավունքն է ճնշվել»,- Factor TV-ի հետ զրույցում նշում է «Գոյ»-ի դերասան Աշոտ Տեր-Մաթևոսյանը`անդրադառնալով իրենց`Սունդուկյան թատրոնին միացնելու գործընթացին, դրան հետևած նստացույցին ու բողոքի ալիքին:
Նրա խոսքով` մեզանում թայֆայականությունը նկատելի է ինչպես թատրոնում, այնպես էլ այլ ոլորտներում. «Թայֆայականության փոսը մեզանում 30 տարի են փորել, միանգամից արմատախիլ չի լինի: Դա տևական ժամանակ պետականություն, ինքնիշխանություն չունենալու հետևանք է»:

Աշոտ Տեր-Մաթևոսյանն այն համոզման է, որ արվեստը պետք է օժանդակվի, ֆինանսավորվի պետության կողմից. «Որ պահից սկսած արվեստը սկսեց ինքն իրեն պահել, դադարելու է արվեստ լինել, վերածվելու է կոմերցիայի: Մեր ժողովուրդն էլ այնքան դառնություն է տեսել, որ, օրինակ, թատրոնում ծանր գործեր չի ուզում դիտել, հատկապես` այսօրվա 30 վայրկյանանոց ռիլերի ֆոնին: Այդ է պատճառը, որ մարդիկ նախապատվությունը սթենդ-ափերին, հումորային թեթև գործերին են նախապատվություն տալիս, ինչի արդյունքում ձևավորվում է արտաբյուջե: Բայց այդ ամենի մեջ արվեստն է կորչում: Արվեստագետը պետք է լինի ապահոված, ոչ թե սոված»:

Դերասանն անդրադառնում է նաև հայկական սերիալներին ու ֆիլմերին, դրանցում առկա քրեական ենթամշակույթի տարրերին. «Հոլիվուդյան որ ֆիլմը նայում ես` Միացյալ Նահանագների դրոշն ես տեսնում, մեր ֆիլմերում այդքան կրիմինալ է քարոզվում, բայց եռագույնը դրանցում չկա, ցո´ւյց տվեք: Պետք չէ´ այդքան կրիմինալ քարոզել»:

Մանրամասները`տեսանյութում:

Աննա Բաբաջանյան