10.08.2026 | 16:33
Հրդեհ Պռոշյան բնակավայրում․ դեպքի վայր են մեկնել փրկարար ծառայության մարտական հաշվարկներ
Խցիկում երկու նստատեղ է պայթել․ Baza-ն հրապարակել է կործանված ադրբեջանական օդանավի անձնակազմի խոսակցության սղագրությունը
Քաղաքականություն
14.02.2025 | 15:25
«Ադրբեջանական ավիաուղիներ»-ի (AZAL) կործանված օդանավի անձնակազմն ինքնուրույն որոշել է թռչել Բաքու, ապա՝ Ակտաու։ Բանակցությունների ամբողջական սղագրությունը հրապարակում է Baza տելեգրամյան ալիքը։
Դրանք վկայում են, որ Գրոզնիում վայրէջք կատարելուց առաջ օդաչուների խցիկում խուճապ է եղել. անձնակազմը պատրաստ չի եղել աշխատել խլացված GPS ազդանշանի պայմաններում։ Երկրորդ օդաչուն խոստովանել է, որ երբեք չի կատարել NDB մոտեցում։
Նշվում է, թե «Ռոսավիացիան» օդաչուներին (NOTAM) ծանուցում է տվել արտակարգ դեպքից մեկ ամիս առաջ, որ GPS-ի խափանումները հնարավոր են Ռուսաստանի տարածքում, ուստի օդաչուները պետք է կարողանային օգտվել վայրէջքի այլ տարբերակներից: Դիսպետչերները երեք անգամ հարցրել են օդաչուներին՝ արդյո՞ք ամեն ինչ կարգին է օդանավի հետ, և արդյո՞ք կապիտանը նախատեսում է արտակարգ դրություն հայտարարել։ Նրանց պատասխանել են, որ ամեն ինչ կարգին է։ Բացի այդ՝ ինքնաթիռում թռչնի հարվածի և գազի բալոնի պայթյունի մասին տեղեկություն է հայտնել օդանավի հրամանատարը։
«Գրոզնի, կառավարումը ձախողվել է։ Թռչնի հարված օդաչուների խցիկին։ Օդաչուների խցիկում երկու նստատեղերը պայթել են»,- հայտնել է նա։
Հիշեցնենք, որ ավելի վաղ Ղազախստանի Տրանսպորտի նախարարությունը հրապարակել էր Ակտաուի մերձակայքում «Ադրբեջանական ավիաուղիներին» (AZAL) պատկանող Embraer 190 ինքնաթիռի կործանման վերաբերյալ նախնական զեկույցը։
Բաքուն էլ շարունակում է պնդել, որ օդանավը խոցվել է ՌԴ-ի կողմից «Պանցիր-Ս» համակարգով, որ հրթիռի բեկորն էլ իր տրամադրության տակ է։
Բացի այդ, Ադրբեջանի իշխանամերձ լրատվամիջոցները հայտնել են, որ Բաքուն նախապատրաստական աշխատանքներ է տանում և պատրաստվում է ՌԴ-ի դեմ օդանավի գործով միջազգային դատարան հայց ներկայացնել։
Թարգմանությունը՝ Էմմա Չոբանյանի
