19.02.2026 | 21:13
ՀՀ-ին և Ճապոնիային հաջողվել է հետևողականորեն զարգացնել քաղաքական երկխոսությունը. Մհեր Գրիգորյան
Թուրք-ադրբեջանական եղբայրությունը Հարավային Կովկասում և դրանից դուրս անվտանգության ու խաղաղության երաշխիք է․ Ալիևը՝ Բաքվում Թուրքիայի նոր դեսպանին
Քաղաքականություն
13.02.2025 | 15:09
Ադրբեջանի նախագահ Իլհամ Ալիևն ընդունել է Բաքվում Թուրքիայի նորանշանակ արտակարգ և լիազոր դեսպան Բիրոլ Աքգյունի հավատարմագրերը։ Ադրբեջանական լրատվամիջոցների փոխանցմամբ՝ հանդիպման ընթացքում Ալիևը հայտարարել է, որ այսօր նույնիսկ աշխարհի ամենամոտ դաշնակիցների թվում չկա ադրբեջանա-թուրքական հարաբերությունների օրինակը։ Նշելով, որ հարաբերությունները, որոնք երկկողմ ռազմավարական դաշինքի մակարդակում են, զարգանում են նաև եռակողմ հարթակներում։ Այս առումով նա ընդգծել է Ադրբեջան-Ուզբեկստան-Թուրքիա և Ադրբեջան-Պակիստան-Թուրքիա եռակողմ համագործակցության մեխանիզմների կարևորությունը։
Զրույցի ընթացքում անդրադարձ է կատարվել նաև միջազգային կազմակերպությունների շրջանակում Ադրբեջանի և Թուրքիայի հաջող համագործակցությանը, ընդգծվել է Բաքվի անդամակցությունը Տնտեսական համագործակցության կազմակերպությանը (D-8) և Անկարայի կողմից անդամակցությանն աջակցությունը։
Ալիևը նաև նշել է, որ Ադրբեջանն ի սկզբանե հայտարարել է սիրիական հարցում Թուրքիային աջակցելու մասին։ Այդ կապակցությամբ նա ընդգծել է, որ Ադրբեջանը նաև պատրաստ է իր ներդրումն ունենալ Թուրքիայի հետ համակարգմամբ Սիրիայում կայունության, անվտանգության ապահովման և հումանիտար խնդիրների լուծման գործում։
«Եվս մեկ անգամ նշվել է, որ ադրբեջանա-թուրքական եղբայրությունն ու բարեկամությունը Հարավային Կովկասի տարածաշրջանում և նրա սահմաններից դուրս կայունության, անվտանգության, խաղաղության և հանգստության երաշխիք է»,- ասվում է ադրբեջանական կողմի տարածած հայտարարության մեջ։
Թարգմանությունը՝ Էմմա Չոբանյանի
