Ադրբեջանցի միլիարդատեր Աղալարովին հաջողվել է խուսափել Crocus City Hall-ի հրդեհի գործով մեղադրանքներից

Մերձմոսկովյան Crocus City Hall համերգասրահի սեփականատերը՝ Crocus International ընկերությունը, տուժող է ճանաչվել 2024 թվականի գարնանը տեղի ունեցած ահաբեկչության գործով։ Այս մասին գրում է The Moscow Times-ը։

Ընկերությունը պատկանում է ադրբեջանցի գործարար Արազ Ագալարովի Crocus Group-ին:

Քրեական դատավարության օրենսգրքի համաձայն՝ տուժողն իրավունք ունի վերանայել գործի նյութերը, մասնակցել դատաքննությանը, ապացույցներ, միջնորդություններ ներկայացնել և վնասի հատուցման քաղաքացիական հայցով հանդես գալ։ Ընդհանուր առմամբ, տուժող է ճանաչվել ավելի քան 1700 մարդ։ Գործով մեղադրյալները 27-ն են։ Դրա հետաքննությունն ավարտվել է փետրվարի սկզբին։

Crocus City Hall-ում ահաբեկչությունը տեղի է ունեցել մարտի 22-ի երեկոյան։ Զինված անձինք «Պիկնիկ» խմբի համերգից առաջ ներխուժել էին համալիր և կրակ բացել մարդկանց վրա, որից հետո հրկիզել դահլիճը և անարգել լքել շենքը։ Հարձակումը, որն ամենաարյունալինն էր Մոսկվայի մարզում վերջին 20 տարում, 145 մարդու կյանք է խլել, ավելի քան 550-ը վիրավորվել են: Հանցագործության չորս մեղավորները միայն հաջորդ օրն են բերման ենթարկվել Բրյանսկի մարզում։ Պարզվել է, որ նրանք Տաջիկստանից են։

Քննչական կոմիտեի պնդմամբ՝ ահաբեկիչների փոքր խմբին հաջողվել է գրեթե ամբողջությամբ այրել 13,000 մ² սրահը՝ օգտագործելով դյուրավառ հեղուկներ։

Հրդեհը մարվել է երեք ուղղաթիռների օգնությամբ, այն էլ՝ միայն մեկ օր անց։ Շենքն ամբողջությամբ այրվել է, տանիքը՝ փլուզվել։ Գործ է հարուցվել անվտանգության պահանջներին չհամապատասխանող ծառայությունների մատուցման դեպքի առթիվ (Քրեական օրենսգրքի 238-րդ հոդվածի 3-րդ մաս): Սկզբում գործը հարուցվել էր «անհայտ անձանց դեմ»։

Սրա հետ մեկտեղ, ահաբեկչությունից տուժածները պահանջում են համալիրի սեփականատերերին ուղղակի պատասխանատվության ենթարկել՝ պնդելով, որ շենքը հագեցած չի եղել հրդեհային անվտանգության համապատասխան համակարգերով։ Սակայն, ի վերջո, մեղադրյալներ են դարձել համերգասրահի երկու անանուն աշխատակիցներ, որոնք գրավի դիմաց ազատ են արձակվել։

Փորձագետները հրդեհի վնասը գնահատել են 10-12 մլրդ ռուբլի։ Crocus City Hall-ն ապահովագրված է եղել Ինգոսստրախի կողմից, սակայն RBC-ի աղբյուրը հայտնել է, որ պայմանագրով նախատեսված գումարը դժվար թե ծածկի վնասները։ Մոսկվայի մարզի իշխանությունները հայտարարել են, որ ավերված համերգասրահը չի վերականգնվի։ Նորը կառուցելու ծրագրեր նույնպես չկան։

Թարգմանությունը՝ Տաթև Ֆռանգյանի