30.04.2026 | 12:00
ՀՀ-ում լրագրողները հաճախ ենթարկվում են ճնշման. Factor TV-ն մի շարք կայքերի հետ կատարում է անկախ վերահսկողի դեր. RSF
Վրաստանում երգչուհի Նինո Կատամաձեին տուգանել են 1800 դոլարով՝ բողոքի ակցիային մասնակցելու համար
Քաղաքականություն
11.02.2025 | 17:32
Վրաստանի Քութայիսիի քաղաքային դատարանը մեղավոր է ճանաչել և տուգանել ի պաշտպանություն Մզիա Ամագլոբելիի բողոքի ակցիայի ինը մասնակիցների, այդ թվում՝ հայտնի երգչուհի Նինո Կատամաձեին։ Այս մասին գրում է Ազատություն ռադիոկայանի վրացական ծառայությունը։
Դատական նիստի ժամանակ 52-ամյա Կատամաձեն կատարել է Վրաստանի հիմնը և հայտարարել, որ ինքը «մայրերի ձայնն է, որոնց երեխաներին ապօրինի ձերբակալում են»։ Դատարանը նրան և մյուս ցուցարարներին մեղավոր է ճանաչել՝ յուրաքանչյուրին տուգանելով 5,000 լարիով (մոտ 1,800 դոլար):
Բողոքի ակցիան, որի համար դատարանի առաջ են կանգնել Կատամաձեն ու ևս ութ ցուցարար, տեղի է ունեցել հունվարի 26-ին Քութայիսիի վերաքննիչ դատարանի դատավոր Մալխազ Օքրոպիրաշվիլիի տան մոտ։
Ակտիվիստները դուրս են եկել փողոց՝ դատապարտելու լրագրող Մզիա Ամագլոբելիի բողոքը մերժելու՝ դատարանի որոշումը։ Լրագրողը կալանավորվել է Բաթումիում բողոքի ակցիաների ժամանակ և արդեն 30 օր է՝ հացադուլ է անում։ Հունվարի 21-ին Քութայիսիի վերաքննիչ դատարանն անընդունելի է համարել Ամագլոբելիի հայցը և նրան թողել կալանքի տակ։
Ոստիկանությունը ցուցարարներին մեղադրել է ակցիաների անցկացման կանոնները խախտելու մեջ։
Վրաստանում խորհրդարանական ընտրություններից հետո զանգվածային բողոքի ցույցեր են սկսվել՝ կապված իշխող «Վրացական երազանք» կուսակցության օգտին ձայների կեղծման մեղադրանքների հետ:
Թարգմանությունը՝ Տաթև Ֆռանգյանի
