06.10.2026 | 14:23
Ռաֆինյան երկարաձգել է «Բարսելոնայի» հետ պայմանագիրը. Աղբյուր
Թուրքիայի իշխանությունները ևս 10 պաշտոնյայի են ձերբակալվել՝ ընդլայնելով Ստամբուլում ընդդիմության դեմ ճնշումները
Քաղաքականություն
11.02.2025 | 21:41
Ստամբուլում առնվազն տասը մարդ է ձերբակալվել գլխավոր ընդդիմադիր Ժողովրդահանրապետական կուսակցության (CHP) կողմից կառավարվող շրջանային թաղամասերի դեմ իրականացված ահաբեկչության հետաքննության շրջանակում։ Ձերբակալվածների թվում են Քարթալ և Աթաշեհիր շրջանների փոխքաղաքապետերը, ինչպես նաև Թուզլա, Ֆաթիհ, Ադալար, Շիշլի և Բեյօղլու քաղաքային խորհուրդների անդամներ, գրում է Bianet-ը։
Ըստ Ստամբուլի գլխավոր դատախազության՝ հետաքննությունը կենտրոնանում է անցյալ տարվա տեղական ընտրություններում CHP-ի ու քրդամետ Ժողովուրդների հավասարության և ժողովրդավարության (DEM) կուսակցության միջև համագործակցության վրա: «Քաղաքային կոնսենսուս» ռազմավարության համաձայն՝ DEM կուսակցությունը թեկնածուների չէր առաջադրել որոշ շրջաններում, մինչդեռ DEM-ի որոշ անդամներ ընտրվել են որպես քաղաքային խորհրդականներ CHP-ի ցուցակներով:
Դատախազությունը պնդում է, որ այս համագործակցությունը կազմակերպվել է օրենքից դուրս գործող Քուրդիստանի աշխատավորական կուսակցության (PKK) կողմից՝ մեգապոլիսներում իր ազդեցությունն ընդլայնելու նպատակով: Հայտարարության մեջ գործընկերությունը նկարագրվում է որպես «կազմակերպության ներկայությունը խոշոր քաղաքներում մեծացնելու ջանք»:
Վաղ առավոտյան ոստիկանական խուզարկություններ են կատարվել, այդ թվում՝ Քարթալի և Աթաշեհիրի փոխքաղաքապետերի գրասենյակներում։
Այս վերջին գործողությունը մի շարք հետաքննությունների մասն է, որոնք ուղղված են այն համայնքների դեմ, որտեղ համագործակցել են CHP-ն և DEM-ը: Հոկտեմբերին ահաբեկչության մեղադրանքով ձերբակալվել էր Էսենյուրթի քուրդ քաղաքապետ Ահմեթ Օզերը, որը CHP-ի անդամ է։ Հունվարին նույն կերպ կալանավորվել է Բեշիքթաշի շրջանի քաղաքապետը։
Բացի այդ, Ստամբուլի քաղաքապետ Էքրեմ Իմամօղլուի նկատմամբ, որը նույնպես CHP անդամ է, առանձին հետաքննություն է ընթանում։ Ի պատասխան այս ճնշումների՝ Իմամօղլուն սոցիալական ցանցերում հայտարարություն է տարածել՝ պնդելով, որ դրանք նպատակ ունեն խաթարել CHP-ի ընտրական հաջողությունը։
«Չեն կարող ընդունել, որ մեր կուսակցությունը 1 միլիոն ձայնի տարբերությամբ հաղթեց մեր մրցակիցներին։ Այդ մարդկանց, որոնք մինչ ընտրությունները սովորական աշխատանք էին կատարում, հիմա հանկարծ պիտակավորվում են որպես «ահաբեկիչներ»»,- նշել է նա։
Իմամօղլուն նաև Թուրքիայի շարունակական տնտեսական դժվարությունները վերագրել է իշխող կուսակցությանը և կոչ արել արտահերթ ընտրություններ անցկացնել։
Թարգմանությունը՝ Էմմա Չոբանյանի
