Toplum TV-ն դադարեցնում է աշխատանքը Ադրբեջանում՝ ճնշումների և լրագրողների կալանավորումների պատճառով

Ադրբեջանական Toplum TV առցանց լրատվամիջոցը հայտարարություն է տարածել Ադրբեջանում գործունեությունը դադարեցնելու մասին։ Կազմակերպությունը կարծում է, որ Ադրբեջանում լրատվամիջոցների նկատմամբ իշխանությունների ճնշումներն անհնար են դարձնում Toplum TV-ի գործունեությունը երկրում։

«2016 թվականից գործող Toplum TV-ն երկրի սակավաթիվ անկախ լրատվամիջոցներից է, որի հիմնական նպատակն է քաղաքացիներին տեղեկացնել երկրում և աշխարհում տեղի ունեցող իրադարձությունների մասին՝ առաջնորդվելով ազնիվ լրագրության սկզբունքներով։ Այս ընթացքում մենք հրապարակել ենք հազարավոր նյութեր՝ հանդիսանալով տեղեկատվության անաչառ աղբյուր»,- ասվում է լրատվամիջոցի հայտարարության մեջ։

Նշվում է, որ վերջին մեկուկես տարվա ընթացքում Ադրբեջանում լրատվամիջոցների վրա աճող ճնշումն ազդել է նաև Toplum TV-ի վրա։ Դրա հիմնադիրն ու մի քանի աշխատակիցներ ձերբակալվել և մեղադրվել են «մաքսանենգության» հոդվածով, իսկ մյուս աշխատակիցներին արգելվել է լքել երկիրը։

«Լրատվամիջոցի աշխատակիցների վրա ճնշումների պատճառն այն է, որ Toplum TV-ն լուսաբանում է քաղաքացիների խնդիրները և հարթակ է տալիս քաղաքական տարբեր հայացքներ ունեցող մարդկանց։ Ցավոք, լրատվամիջոցների նկատմամբ ճնշումներն անհնարին են դարձնում Toplum TV-ի գործունեությունը երկրում: Ուստի լրատվամիջոցը կշարունակի իր աշխատանքն իրականացնել երկրից դուրս ապրող լրագրողների միջոցով։ Հուսով ենք, որ մեր ընթերցողները կհասկանան այս որոշումը»,- ասվում է Toplum TV-ի հայտարարության մեջ:

Նշենք, որ 2024 թվականի մարտից են սկսվել Tolum TV-ի աշխատակիցների ձերբակալությունները։ Այս գործով 2025 թվականի հունվարին կալանավորվել է նաև Ֆարիդ Իսմայիլովը, իսկ փետրվարի 6-ին՝ Շահնազ Բեյլերքըզին։

Ընդհանուր առմամբ, 2023 թվականի նոյեմբերից Ադրբեջանում մաքսանենգության մեղադրանքով կալանավորվել են շուրջ 30 լրագրողներ և հասարակական ակտիվիստներ։ Նրանցից ոչ ոք չի ընդունում մեղքը և իր ձերբակալությունը կապում է մասնագիտական ​​գործունեության և քաղաքական պատվերների հետ։

Թարգմանությունը՝ Էմմա Չոբանյանի