Եվրոպացի առաջնորդներն ու ՄԱԿ-ը դատապարտել են Հաագայի դատարանի նկատմամբ Թրամփի կողմից պատժամիջոցների սահմանումը

Միջազգային քրեական դատարանը (ՄՔԴ) պետք է կարողանա անարգել շարունակել իր պայքարը համաշխարհային անպատժելիության դեմ։ Այս մասին հայտարարել է Եվրահանձնաժողովի նախագահ Ուրսուլա ֆոն դեր Լեյենը՝ արձագանքելով ԱՄՆ նախագահ Դոնալդ Թրամփի կողմից միջազգային դատական ատյանի դեմ պատժամիջոցների սահմանմանը, գրում է France 24-ը։

«ՄՔԴ-ն երաշխավորում է պատասխանատվությունը միջազգային հանցագործությունների համար և ձայն է տալիս զոհերին ամբողջ աշխարհում: Այն պետք է կարողանա ազատորեն պայքարել համաշխարհային անպատժելիության դեմ: Եվրոպան միշտ հանդես կգա արդարության և միջազգային իրավունքի հարգման օգտին»,- գրել է նա X-ի իր միկրոբլոգում։

Եվրոպական խորհրդի ղեկավար Անտոնիո Կոշտան էլ նախազգուշացրել է, որ ՄՔԴ-ի նկատմամբ պատժամիջոցները սպառնալիք են միջազգային իրավունքի և ավելի լայն դատական ​​համակարգի համար:

«ՄՔԴ-ի նկատմամբ պատժամիջոցներ կիրառելը սպառնում է Դատարանի անկախությանը և խաթարում է միջազգային քրեական արդարադատության համակարգը որպես ամբողջություն»,- գրել է Կոշտան X-ում։

Գերմանիայի կանցլեր Օլաֆ Շոլցը հայտարարել է, որ նախագահ Դոնալդ Թրամփը սխալ է ՄՔԴ-ի դեմ պատժամիջոցների սահմանման հարցում։

«Պատժամիջոցները սխալ գործիք են: Դրանք վտանգի տակ են դնում մի ինստիտուտ, որը պետք է երաշխավորի, որ այս աշխարհի բռնապետերը չեն կարող պարզապես հալածել մարդկանց և պատերազմներ սկսել, և դա շատ կարևոր է»,- ասել է Շոլցը:

ՄՔԴ-ն իր հերթին դատապարտել է Թրամփի գործադիր հրամանը, որով ԱՄՆ պատժամիջոցներ է սահմանում դատարանի դեմ։ Նշվում է, որ գործադիր հրամանը, որը նպատակ ունի պատժամիջոցներ կիրառել իր պաշտոնյաների նկատմամբ, վնասում է դատարանի «անկախ և անաչառ դատական ​​աշխատանքին»։ Հայտարարության մեջ ասվում է նաև, որ ՄՔԴ-ն «խստորեն կանգնած է իր անձնակազմի կողքին և խոստանում է շարունակել արդարություն ու հույս ապահովել վայրագությունների միլիոնավոր անմեղ զոհերի համար ամբողջ աշխարհում»։

ՄԱԿ-ն էլ հայտարարել է, որ խորապես ափսոսում է նախագահ Դոնալդ Թրամփի՝ ՄՔԴ-ի դեմ ԱՄՆ պատժամիջոցներ սահմանելու որոշման համար և հորդորել է չեղարկել որոշումը:

«Մենք խորապես ափսոսում ենք դատարանի անձնակազմի նկատմամբ հայտարարված անհատական ​​պատժամիջոցների համար և կոչ ենք անում չեղարկել այդ միջոցը»,- ասել է ՄԱԿ-ի մարդու իրավունքների գրասենյակի խոսնակ Ռավինա Շամդասանին։

Թարգմանությունը՝ Էմմա Չոբանյանի