Թրամփը պատժամիջոցներ է սահմանել Հաագայի դատարանի նկատմամբ՝ Նեթանյահուի կալանավորման օրդեր տալու պատճառով

ԱՄՆ նախագահ Դոնալդ Թրամփը գործադիր հրաման է ստորագրել, որով պատժամիջոցներ է սահմանում Միջազգային քրեական դատարանի (ՄՔԴ) նկատմամբ՝ ԱՄՆ-ի և Իսրայելի դեմ «ապօրինի և չարդարացված գործողությունների համար»։ Փաստաթուղթը հրապարակվել է Սպիտակ տան կայքում, փոխանցում է Current time-ը։

Դրանում ասվում է, որ դատարանը «չարաշահել է իր լիազորությունները՝ Իսրայելի վարչապետ Բենիամին Նեթանյահուի և պաշտպանության նախկին նախարար Յոավ Գալանտի նկատմամբ կալանքի անհիմն օրդեր տալով»։

«ՄՔԴ-ն իրավազորություն չունի Միացյալ Նահանգների կամ Իսրայելի նկատմամբ, քանի որ այս երկրներից որևէ մեկը Հռոմի կանոնադրության կողմ կամ ՄՔԴ անդամ չէ: Երկրներից որևէ մեկը չի ընդունել ՄՔԴ-ի իրավասությունը, և երկուսն էլ զարգացող ժողովրդավարություններ են՝ բանակներով, որոնք խստորեն հետևում են պատերազմի օրենքներին»,- ասել է Թրամփը:

ԱՄՆ պատժամիջոցները ներառում են ակտիվների սառեցում և մուտքի արգելք ՄՔԴ-ի պաշտոնյաների, աշխատակիցների և գործակալների, ինչպես նաև նրանց հարազատների համար:

Հիշեցնենք, որ ՄՔԴ-ն Նեթանյահուի և Գալանտի կալանավորման օրդեր էր տվել 2024 թվականի նոյեմբերին։ Առաջին նախաքննական պալատը հայտարարել էր, որ նրանք, մյուսների հետ միասին, պատասխանատու են ռազմական հանցագործության (սովը որպես պատերազմի վարման մեթոդ օգտագործելու) և մարդկության դեմ հանցագործությունների համար՝ «սպանություն, հալածանք և այլ անմարդկային արարքներ»:

Իսրայելի նախագահ Իցհակ Հերցոգը ՄՔԴ-ի որոշումն անվանել էր «անբարեխիղճ և վիրավորական»: Իսկ Նեթանյահուի գրասենյակի խորհրդական Դմիտրի Գենդելմանը նշել էր, որ Միջազգային քրեական դատարանը որոշել է «աջակցել հակասեմական երանգավորմամբ ապատեղեկատվության արշավին, որի նպատակն է մեկուսացնել Իսրայելն իր դաշնակիցներից և նպաստել երկրի դեմ ահաբեկչական հարձակումներին»։

Հավելենք, որ փետրվարի 4-ին Թրամփն ընդունել էր Նեթանյահուին։ Նա առաջին օտարերկրյա ղեկավարն է, որին ԱՄՆ նախագահն ընդունել է Սպիտակ տանը պաշտոնը ստանձնելուց հետո։

Թարգմանությունը՝ Էմմա Չոբանյանի