«Կարին» ավանդական երգի-պարի խմբի հիմնադիր և գեղարվեստական ղեկավար, ՀՀ մշակույթի վաստակավոր գործիչ, Արցախյան պատերազմի մասնակից Գագիկ Գինոսյանի մահվան առաջին տարելիցն էր։ Այսօր «Եռաբլուր» զինվորական պանթեոն էին այցելել պարուսույցի հարազատները, պարընկերները, մարտական ընկերները՝ հարգանքի տուրք մատուցելու Գագիկ Գինոսյանի հիշատակին: Գինոսյանի դուստրը՝ Ծովինար Գինոսյանը, լրագրողների հետ զրույցում ասաց, որ հոր հետ ապրելն ու աշխատելը անփոխարինելի են եղել։
«Ժամանակը ոչինչ չի բուժում, ուղղակի սկսում ես հարմարվել այդ մտքին, որ ինքը չկա, բայց չի նշանակում, որ վերքն ինչ-որ կերպ փակվում է, չի ցավեցնում։ Ես ամեն օր մտքերով իր հետ եմ։ Ինձ ասում են՝ հայրդ ստիպել է, որ գնաք պարի, ասում եմ՝ չէ, ինչ-որ պահի մեծացել և հասկացել ենք, իսկ ոնց կարելի է չգնալ պարի»։
Ծովինար Գինոսյանի խոսքով, պարի, Արցախի հանդեպ սերը հայրը փոխանցել է նաև իր շրջապատի մարդկանց. «Պարախմբի բոլոր տղաները 2020 թվականին միաձայն որոշեցին գնալ պատերազմ։ Դա պատահականություն չի։ Ինչպես ինքն է ապրել, նույն ձև դաստիարակել է իր շրջապատում եղած մարդկանց, բոլորին կրթում էր լինել այդպիսին։ Երբ որ գալիս է պահը, բոլորն իրենց դրսևորում են այնպես, ինչպես պետք է դրսևորեն»։
Գագիկ Գինոսյանը ծնվել է 1966-ի օգոստոսի 3-ին Վրաստանի Ախալցխա քաղաքում։ 1992-94 թթ «Ազատագրական Բանակ» ջոկատի «Իքս» դասակի կազմում մասնակցել է ԼՂ ազատագրական պայքարին: Զինադադարից հետո, շարունակել է ծառայությունը ՀՀ բանակում` որպես սպա: 1995-96 թթ ավարտել է Մարշալ Շապոշնիկովի անվան «Վիստրել» բարձրագույն սպայական դասընթացը և ստացել գնդի և բրիգադի հրամանատարի որակավորում: 1996թ. սեփական դիմումի համաձայն զորացրվել է ՀՀ Զինված Ուժերից և ընդգրկվել «Ակունք» ազգագրական երգի-պարի խմբում:
2001 թ. ստեղծել և ղեկավարում էր «Կարին» և «Ծովակ» ավանդական երգի-պարի խմբերը: 2005 թ.-ից «Կարին»-ի ջանքերով իրականացնում էր «Մեր պարերը և մենք» պարուսուցման ամենամսյա դասընթացը: 2008 թ. «Հայ Ասպետ» հեռուստահաղորդման շրջանակներում հեղինակել է հայ իրականության մեջ առաջին՝ «Հայկական պար» DVD պարուսույցը: Գ. Գինոսյանը զբաղվում էր ազգային պարերի գրառմամբ և դրանց գիտական ու տեսական ուսումնասիրությամբ:
