07.10.2026 | 10:00
Ազգային ժողովի նիստը՝ ՈՒՂԻՂ
Թեհրանը կտրականապես մերժում է Գազայի հատվածից պաղեստինցիներին «բռնի տեղահանելու»՝ Թրամփի ծրագիրը․ Իրանի ԱԳՆ
Քաղաքականություն
06.02.2025 | 16:57
Իրանը միանշանակ դատապարտում է Գազայի հատվածից պաղեստինցիներին դուրս մղելու՝ ԱՄՆ-ի, այսպես կոչված, «ծրագիրը»՝ այն անվանելով պաղեստինյան ինքնությունը ջնջելու՝ իսրայելական ռեժիմի ավելի լայն սխեմայի ընդլայնում։ Իրանական Mehr գործակալության հաղորդմամբ՝ այս մասին հայտարարել է Իրանի ԱԳՆ խոսնակ Էսմայիլ Բաղային։
«Գազայի հատվածը մաքրելու և պաղեստինցի ժողովրդին բռնի տեղահանելու ծրագիրը պաղեստինյան ազգը ոչնչացնելու՝ Իսրայելի հաշվարկված ծրագրի շարունակությունն է։ Գազայի հատվածը գրավելու մասին ԱՄՆ-ի վերջին հայտարարությունն աննախադեպ հարձակում է միջազգային իրավունքի հիմնական սկզբունքների և ՄԱԿ-ի կանոնադրության վրա»,- ասել է Իրանի ԱԳՆ պաշտոնյան:
Նա ընդգծել է նման գործողությունների անհամատեղելիությունը «միջազգային իրավունքի և մարդու իրավունքների հիմնարար սկզբունքների հետ»՝ կոչ անելով միջազգային հանրության անդամների կողմից դա ամբողջապես մերժել։
«76 տարի շարունակ Պաղեստինի ժողովուրդն ամուր կանգնած է բռնազավթիչ ռեժիմի ամենածանր հանցագործությունների և խախտումների դեմ՝ հրաժարվելով լքել իր նախնիների հողը»,- ասել է Բաղային՝ նշելով, որ «պաղեստինցիները երբեք թույլ չեն տա ԱՄՆ-ին և Իսրայելի ռեժիմին ջնջել իրենց պատմական և ազգային ինքնությունը»։
Իրանցի պաշտոնյան միջազգային հանրությանը կոչ է արել միավորվել նման սխեմաների դեմ՝ հատկապես ընդգծելով բոլոր կառավարությունների պատասխանատվությունը՝ աջակցելու Պաղեստինի ժողովրդի ինքնորոշման իրավունքին և օկուպացիայից ազատմանը:
«Մենք կոչ ենք անում ՄԱԿ-ի Անվտանգության խորհրդին, ՄԱԿ-ի Գլխավոր վեհաժողովին և գլխավոր քարտուղարին՝ վճռականորեն մերժել այս առաջարկը»,- ասել է նա՝ ողջունելով իսլամական և տարածաշրջանային երկրների միահամուռ հակազդեցությունը։
Հիշեցնենք, որ ԱՄՆ նախագահ Դոնալդ Թրամփը հայտարարել էր, որ Միացյալ Նահանգները կարող է վերահսկողության տակ «վերցնել» Գազայի հատվածը, հնարավոր է՝ ամերիկյան զորքերի օգնությամբ, ու առաջարկել այնտեղ բնակվող պաղեստինցիներին հեռանալ։
Թարգմանությունը՝ Էմմա Չոբանյանի
