Իսրայելի ՊՆ ղեկավարը բանակին հանձնարարել է Գազայի բնակիչների հեռացման ծրագիր մշակել

Իսրայելի պաշտպանության նախարար Իսրայել Կացը երկրի բանակին հանձնարարել է պատրաստել ծրագիր, որը թույլ կտա աջակցել Գազայի բնակիչներին, որոնք ցանկանում են ինքնակամ լքել հատվածը, գրում է The Jerusalem Post-ը։

«Ծրագիրը կներառի ցամաքային անցումներով ելքի տարբերակներ, ինչպես նաև ծովային և օդային ճանապարհով ելքի հատուկ դրույթներ»,- ասել է Կացը:

Նա ողջունել է Գազայի վերաբերյալ ԱՄՆ նախագահ Դոնալդ Թրամփի ծրագիրը, որը ներկայացրել էր Վաշինգտոնում Իսրայելի վարչապետ Բենիամին Նեթանյահուի հետ հանդիպումից հետո։ Կացը նշել է, որ ՀԱՄԱՍ-ը Գազայի բնակիչներին օգտագործել է որպես կենդանի վահան, ստացված մարդասիրական օգնությունը յուրացրել իր նպատակների համար և թույլ չի տվել նրանց լքել երկիրը։

«Գազայի բնակիչներին պետք է ազատություն տրվի հեռանալու և արտագաղթի համար, ինչպես դա տեղի է ունենում ամբողջ աշխարհում»,- հավելել է նա:

Կացն ասել է, թե «այն երկրները, ինչպիսիք են Իսպանիան, Իռլանդիան, Նորվեգիան և այլք, որոնք կեղծ մեղադրանքներ և զրպարտություններ են ներկայացրել Իսրայելի դեմ՝ Գազայում նրա գործողությունների համար, պարտավոր են թույլատրել Գազայի ցանկացած բնակչի մուտք գործել իրենց տարածք»։

«Նրանց կեղծավորությունը կբացահայտվի, եթե նրանք հրաժարվեն դա անել: Կան երկրներ, ինչպիսիք են Կանադան, որն ունի ներգաղթի կառուցվածքային ծրագիր և նախկինում պատրաստակամություն է հայտնել ընդունել Գազայից բնակիչներին»,-հայտարարել է Իսրայելի պաշտպանության նախարարը։

Հիշեցնենք, որ ԱՄՆ նախագահ Դոնալդ Թրամփը հայտարարել էր, որ Միացյալ Նահանգները կարող է վերահսկողության տակ «վերցնել» Գազայի հատվածը, հնարավոր է՝ ամերիկյան զորքերի օգնությամբ, և առաջարկել այնտեղ բնակվող պաղեստինցիներին հեռանալ։

Թարգմանությունը՝ Էմմա Չոբանյանի