Ծանուցումներ են ուղարկել․ ԶՊՄԿ ղեկավարությունն ու աշխատակիցները կրկին չեն կարողացել համաձայնության գալ. ՏԵՍԱՆՅՈՒԹ

Այսօր՝ երեկոյան ժամը 5-ին, Զանգեզուրի պղնձամոլիբդենային կոմբինատի ղեկավարության և աշխատակիցների հանդիպումը կրկին ավարտվել է առանց համաձայնության։ Այս մասին Factor.am-ին տեղեկացրեց գործադուլը համակարգող խորհրդի անդամ Վահե Մխիթարյանը։

Նրա խոսքով՝ հանդիպումը երկար է տևել, կողմերը մնացել են իրենց դիրքորոշումներին։ ԶՊՄԿ-ի մեկ այլ աշխատակցի խոսքով էլ՝ բանավոր խոստացել են իրենց պահանջները կատարել, բայց դա իրենց չի բավարարում։

«Պայքարը շարունակելու ենք՝ մինչև մեր պահանջները չկատարվեն։ Մեզ բանավոր կերպով խոստանում են, որ գնացեք, աշխատեք, մենք ձեր պահանջները կկատարենք, բայց մենք էդ բանավորը լսել ենք, հիմա մեզ պետք է, որ իրենք հայտարարությամբ հանդես գան ու ասեն, որ էդ ամենն անելու են, որ մենք անցնենք բնականոն աշխատանքի։ Սրանով առաջինը մենք ենք տուժում, որովհետև մենք էս չաշխատած օրերի համար գումար չենք ստանալու»,- Factor.am-ի հետ զրույցում նշեց ԶՊՄԿ-ի աշխատակիցը։

Նրա խոսքով՝ հանդիպման ընթացքում նաև փորձել են վախեցնել միջին օղակի ղեկավար կազմին։ «Ասել են՝ գնացեք՝ ոնց ուզում եք աշխատացրեք, դա վախեցնել ա, էլի, բայց մեր ղեկավարներն ասել են, որ մեր կողմից են»,- հավելեց գործադուլի մասնակիցը։

Հիշեցնենք, որ արդեն 6-րդ օրն է՝ ԶՊՄԿ-ի հարյուրավոր աշխատակիցներ գործադուլ են անում՝ պահանջելով աշխատավարձի բարձրացում 120-ից 150 հազար դրամի չափով։ Կառույցի ղեկավարությունը, սակայն, պահանջն անիրատեսական է համարում։

Անժելա Պողոսյան