Ռոսավիացիան հայտարարել է, որ ադրբեջանական օդանավի աղետի վերաբերյալ Ղազախստանի զեկույցում կատարվածի պատճառները նշված չեն

Ղազախական կողմը չի բացահայտել այն կողմնակի առարկաները, որոնք հայտնվել են «Ադրբեջանական ավիաուղիներ»-ի օդանավում մինչև Ակտաուում կործանվելը, Ղազախստանի տրանսպորտի նախարարության զեկույցը «նախնական է և չի պարունակում որևէ եզրակացություն միջադեպի պատճառների մասին»։ Այս մասին հայտարարել է Ռոսավիացիան, գրում է Ինտերֆաքսը։

«Նախնական զեկույցը հաստատում է, որ օդանավը վնաս է կրել արտաքին ազդեցության հետևանքով: Այնուամենայնիվ, զեկույցը չի արտացոլում, որ ղազախական կողմն օդանավում կողմնակի առարկաներ է հայտնաբերել, մինչդեռ Ռուսաստանի Դաշնությունն առ այսօր նման հնարավորություն չի ունեցել, քանի որ այդ տարրերն իրեն չեն փոխանցվել փորձաքննության համար»,- նշել է դաշնային գործակալությունը։

Նշվում է նաև, որ զեկույցում հաստատվում է՝ անձնակազմը չի օգտվել այլընտրանքային օդանավակայաններից, որոնք  առաջարկել են ռուս ավիակարգավարները։

«Զեկույցը հաստատում է ավելի վաղ հաղորդված տեղեկությունն այն մասին, որ անձնակազմն է ընտրել այլընտրանքային վայրէջքի օդանավակայանը՝ ինքնուրույն ընտրելով Ակտաուն։ Անձնակազմը չի օգտվել ռուս դիսպետչերների կողմից առաջարկված Մախաչկալայի և Միներալնիե Վոդիի այլընտրանքային օդանավակայաններից՝ չնայած օդանավն ընդունելու համար այդ օդանավակայանների տեխնիկական պատրաստվածությանը»,- նշել են գերատեսչությունում՝ հավելելով, որ թռչունների ինքնաթիռին հարվածելու և թթվածնի բաքի պայթյունի մասին տեղեկությունը ստացվել է նաև անձնակազմից։

«Հանձնաժողովի աշխատանքները կշարունակվեն, իսկ կատարվածի վերաբերյալ եզրակացությունները կներկայացվեն վերջնական զեկույցում»,- ասվում  է հաղորդագրության մեջ։

Հիշեցնենք, որ Ղազախստանի տրանսպորտի նախարարությունը հրապարակել է ինքնաթիռի կործանման վերաբերյալ նախնական զեկույցը, որը պարունակում է թռիչքի պատմության, ինքնաթիռի վնասման, օդերևութաբանական, բեկորների  և այլնի մասին տեղեկություններ։ Միաժամանակ, Ադրբեջանի կառավարության աղբյուրները պնդում են, որ օդանավը խոցվել է ՌԴ-ի կողմից «Պանցիր Ս» համակարգով։

Թարգմանությունը՝ Էմմա Չոբանյանի