Քաղաքականություն
05.02.2025 | 17:05
Թուրքիայի ԱԳ նախարար Հաքան Ֆիդանը քննադատել է ԱՄՆ նախագահ Դոնալդ Թրամփի՝ Գազայի հատվածը վերահսկողության տակ վերցնելու և պաղեստինցիներին այլ երկրներում վերաբնակեցնելու առաջարկը, գրում է TRT Haber-ը։
«Գազայի հատվածի հետ կապված ԱՄՆ նախագահ Թրամփի հայտարարությունը զարմացրել է նաև աշխարհին։ Գազայի մասով Թրամփի ծրագիրն անընդունելի է։ Տեղահանության խնդիրն այնպիսի իրավիճակ է, որը ո՛չ տարածաշրջանը, ո՛չ մենք չենք կարող ընդունել։ Ժամանակի կորուստ է նույնիսկ դրա մասին մտածելը: Սխալ է այն բացել անգամ քննարկման համար»,-ասել է Ֆիդանը Անադոլուի հետ զրույցում՝ նշելով, որ դեմ են ցանկացած նախաձեռնության, որը բացառում է Գազայի ժողովրդին։
Նա նշել է, որ աշխարհը շարժվում է դեպի ջունգլիների օրենքը, որտեղ հզորները գործում են «Ես դա անում եմ, որովհետև ուժեղ եմ» փիլիսոփայությամբ՝ առանց հաշվի առնելու ուրիշների կարիքները։
Հիշեցնենք՝ Թրամփը հայտարարել էր, որ Միացյալ Նահանգները կարող է վերահսկողության տակ «վերցնել» Գազայի հատվածը, հնարավոր է՝ ամերիկյան զորքերի օգնությամբ, նաև առաջարկել այնտեղ ապրող պաղեստինցիներին հեռանալ։
Թարգմանությունը՝ Էմմա Չոբանյանի
