ԱՄՆ Սենատի հանձնաժողովը հավանություն է տվել Արցախ այցելած Թուլսի Գաբարդի թեկնածությանը հետախուզության ղեկավարի պաշտոնում

ԱՄՆ Սենատի հետախուզության հանձնաժողովը ձայներ 9 կողմ և 8 դեմ հարաբերակցությամբ հավանություն է տվել նախագահ Դոնալդ Թրամփի կողմից ազգային հետախուզության տնօրենի պաշտոնում Թուլսի Գաբարդի ընտրությանը՝ վերացնելով նրա առաջադրման համար կարևոր խոչընդոտը, գրում է NBC News-ը։

Հանձնաժողովի գործողությունները ճանապարհ են բացում ամբողջ Սենատի համար՝ որոշելու՝ արդյո՞ք Գաբարդը պետք է հաստատվի որպես երկրի հետախուզության բարձրաստիճան պաշտոնյա:

«Ես ուրախ եմ, որ Սենատի հետախուզության հանձնաժողովը քվեարկեց Ազգային հետախուզության տնօրենի պաշտոնում Թուլսի Գաբարդի թեկնածության օգտին»,- ասել է հանձնաժողովի նախագահ Թոմ Քոթոնը:

Անցյալ շաբաթ իր հաստատման լսումների ժամանակ Գաբարդը բախվել էր Էդվարդ Սնոուդենի նկատմամբ իր դիրքորոշման վերաբերյալ որոշ հանրապետականների սուր հարցադրումներին։ Դրանք ենթադրություններ էին առաջացրել այն մասին՝  արդյո՞ք Գաբարդը աջակցություն կստանա հանձնաժողովում, որտեղ հանրապետականները մեծամասնություն են կազմում:

Գաբարդը նախկինում կոչ էր արել ներում շնորհել Սնոուդենին, սակայն նիստի ժամանակ հրաժարվել էր՝ ասելով, որ ներում կամ ներողություն չի հայցի Ազգային անվտանգության գործակալության նախկին աշխատակցի համար, որը մեղադրվում է լրտեսության մեջ:

Հանձնաժողովի փակ քվեարկությունից առաջ հանձնաժողովի երկու հանրապետական ​​սենատորներ, որոնք համարվում էին պոտենցիալ հակառակորդներ, ազդանշան են տվել, որ կաջակցեն Գաբարդին:

Հավելենք, որ 2017 թվականի սեպտեմբերին, դեռևս կոնգրեսական լինելու ընթացքում, Գաբարդը ԱՄՆ օրենսդիրների հետ այցելել է Հայաստան և Արցախ, եղել Ստեփանակերտում ու Շուշիում, հանդիպել Արցախի պաշտոնյաների հետ։ Այս այցը հարուցել էր պաշտոնական Բաքվի դժգոհությունը։ Ադրբեջանի ԱԳՆ-ն «սադրանք» էր անվանել ամերիկացի օրենսդիրների այցը Լեռնային Ղարաբաղ և հայտարարել, որ նրանք ներառվել են սև ցուցակում։

Թարգմանությունը՝ Էմմա Չոբանյանի