30.04.2026 | 09:45
ՀՀ տարածքում ավտոճանապարհները հիմնականում անցանելի են
Ֆիցոն Բրյուսելում քննարկել է Ուկրաինայի տարածքով Սլովակիա ադրբեջանական գազի տարանցման հարցը
Քաղաքականություն
04.02.2025 | 16:34
Սլովակիայի վարչապետ Ռոբերտ Ֆիցոն ԵՄ անդամ երկրների պաշտպանության ոլորտի վերաբերյալ ոչ պաշտոնական գագաթնաժողովից հետո հաստատել է, որ ԵՄ էներգետիկայի և բնակարանային հարցերով հանձնակատար Դեն Յորգենսենի հետ քննարկել է Ուկրաինայի տարածքով դեպի Սլովակիա ադրբեջանական գազի փոխադրման հարցը, գրում է News Now-ն։
Նա նշել է, որ կառավարությունների և պետությունների ղեկավարները ոչ պաշտոնական բանակցություններում քննարկել են ԵՄ-ի և ԱՄՆ-ի միջև առևտրային պատերազմի հավանականությունը՝ հաշվի առնելով ԱՄՆ նախագահ Դոնալդ Թրամփի կողմից ընդունված տարբեր որոշումները։ Ֆիցոն նաև հավելել է, որ Եվրոպայում պաշտպանական ծախսերը մեծացնելու բանակցություններում ճնշում է զգացվել։
«Մենք կրկին քննարկել ենք Սլովակիայի համար գազի հարցը: Եվրահանձնաժողովի հետ միասին մենք աշխատում ենք Ադրբեջանից Սլովակիա գազի ներկրման այլընտրանքի վրա, որը կապահովի մեր երկրի լավ, որակյալ գազամատակարարումը ներքին սպառման առումով»,- ասել է նա՝հավելելով, որ դա կօգնի աստիճանաբար ազդել Ուկրաինայի տարածքով գազի տարանցման վրա։
Ֆիցոն նշել է՝ Սլովակիայի համար շուտով լավ նորություններ կլինեն։
Եվրահանձնակատար Դեն Յորգենսենն իր հերթին սոցցանցերում գրել է, որ շարունակում է բանակցությունները Սլովակիայի վարչապետի հետ էներգետիկ հարցերի շուրջ, երկու կողմերն էլ լուծումներ են փնտրում գազի տարանցման խափանումների ազդեցությունը մեղմելու և Եվրամիության RepowerEU ծրագրին համապատասխան գազի մատակարարում ապահովելու համար:
Հիշեցնենք, որ ավելի վաղ Ֆիցոն հայտարարել էր, որ իրենց կողմից գործադրվող ճնշումների ֆոնին է Ուկրաինայի նախագահ Վլադիմիր Զելենսկին սկսել խոսել ադբեջանական գազն իր երկրի տարածքով Եվրոպա հասցնելու մասին։
Թարգմանությունը՝ Էմմա Չոբանյանի
