Քաղաքականություն
31.01.2025 | 22:35
Ուկրաինայի նախագահ Վլադիմիր Զելենսկին արդեն թույլատրում է Ադրբեջանից գազի տարանցման հնարավորությունը Ուկրաինայի տարածքով, բայց Եվրոպայի համար լավագույն լուծումը կլինի այն, որ Կիևը վերսկսի ռուսական վառելիքի մղումը։ Այս մասին հայտարարել է Սլովակիայի վարչապետ Ռոբերտ Ֆիցոն։
«Զելենսկիի վրա մեր կողմից գործադրվող ահռելի ճնշման ներքո Ուկրաինան սկսում է խոսել իր տարածքով Եվրոպա ադրբեջանական գազի տարանցման հնարավորությունը դիտարկելու պատրաստակամության մասին»,-ասել է Ֆիցոն TA3 հեռուստաալիքին։
Ինչպես ընդգծել է Սլովակիայի վարչապետը, «Եվրոպայի համար ամենախելամիտ լուծումը կլինի շարունակել ռուսական գազի տարանցումը Ուկրաինայի տարածքով»։
Ըստ նրա՝ Ռուսաստանից փոխադրումները դադարեցնելու Զելենսկիի որոշումը «աղետալի հետևանքներ ունի, որոնք արտացոլվում են Եվրոպայում գազի գնի վրա»։
Ֆիցոն ասել է, որ Բրատիսլավան «դեռևս խնդիրներ չունի» ներքին սպառման հետ կապված, բայց 2026 թվականին կարող է դժվարություններ ունենալ գազի պահեստները լցնելու հարցում, և երկիրը նույնպես զգալի եկամուտ է կորցնում տարանցման վճարներից։
Նա նաև հայտարարել է, որ Ուկրաինայի տարածքով ռուսական գազի տարանցման վերականգնումը կարող է դառնալ Մոսկվայի և Կիևի միջև հնարավոր զինադադարի վերաբերյալ ապագա համաձայնագրի մաս։
Հավելենք, որ ավելի վաղ Զելենսկին խոսել էր Կիևի պատրաստկամության մասին ադրբեջանական գազը ուկրաինական տարածքով Եվրոպա հասցնելու։ Նա հայտարարել էր, որ այդ հարցը Դավոսում քննարկել է Ադրբեջանի նախագահ Իլհամ Ալիևի հետ։
Թարգմանությունը՝ Էմմա Չոբանյանի
