Վարչապետը հեծանիվ վարել է քարոզում, բայց 6 տարում 1 մետր հեծանվուղի Երևանում չի ավելացել. Մնացականյան. ՏԵՍԱՆՅՈՒԹ

«Բոյկոտը տրամաբանական որոշում է, սա կիսատ-պռատ ռեֆորմ է, չես կարող թաքնվել «ռեֆորմ» բառի ետևում և անել այն, ինչ ցանկանում ես: Քաղաքապետարանից չեն կարողանում մարդկանց բացատրել` ինչու պետք է տրանսպորտի սակագինը բարձրանա, վերջը ինչ է լինելու: Մի կողմից ուզում են խրախուսել, որ մարդիկ հասարակական տրանսպորտից օգտվեն, մյուս կողմից գին են բարձրացնում: Սա անդունդ է քաղաքացիների և քաղաքապետարանի միջև»,- Factor TV-ի հետ զրույցում տեսակետ է հայտնում քաղաքային պլանավորող, Կենտրոն վարչական շրջանի նախկին ղեկավար Վիկտոր Մնացականյանը` անդրադառնալով փետրվարի 1-ից Երևանում ներդրված նոր ուղևորատոմսին` 150 դրամ` նախկին 100-ի փոխարեն:

Նրա խոսքով` քաղաքապետարանը ո´չ մասնագետների, ո´չ հանրության, մասնավորապես` երիտասարդների հետ որևէ կերպ չի երկխոսում. «Ավագանիում էդ խելքին են, որ իրար քաշքշում, խփում են և ուզում են երևանցու գրպանից փող «քերեն»: Մինչդեռ քաղաքի համար անընդհատ պետք է նոր գումարներ բերել, բայց ոչ` երևանցու գրպանի հաշվին: Ինվեստիցիան ասֆալտի վրա չեն անում, այլ`բնակչի»:

Երևանում 6 տարում 20 հազար շինթույլտվություն է տրվել: «Հայփոստի» վարչական մասնաշենքի տեղում «Համաշխարհային առևտրի կենտրոն» է նախատեսվում կառուցել, Օրբելի-Բաղրամյան խաչմերուկում էլ 35 հարկանի 5 շենք է նախատեսվում կառուցել: Վիկտոր Մնացականյանն ասում է` Երևանին նման մասշտաբի շենքեր պետք չեն. «Սա ո´չ Դուբայն է, ո´չ Հոնկոնգը, Երևանում երկնաքերերը չեն կարող սիմվոլ դառնալ, տարե´ք դրանք: Մեզ օտար են դրանք: Այդպիսով Երևանի դեմքը կկորչի, կդառնանք սովորական քաղաք: Բացի այդ` մենք սեյսմիկ գոտում ենք, մեզ 10 հարկից ավելի շենքեր կառուցել չի խրախուսվում»:

Վիկտոր Մնացականյանը խոսում է նաև այն մասին, որ Երևանում փողոցները չեն վերափոխվում մարդկանց համար. «Վարչապետը հեծանիվ վարել է քարոզում, բայց 6 տարում 1 մետր հեծանվուղի Երևանում չի ավելացել: Մեկը չկա, գա-ասի`պարո´ն վարչապետ, հեծանիվի գիծ ենք սարքել, արի, քշի, քարոզն էֆեկտ չունի»:

Մանրամասները`տեսանյութում:

Աննա Բաբաջանյան