Թուրքիայի վերջին հայկական գյուղը կանգնած է օտարման սպառնալիքի առաջ

Վաքըֆլը կամ Վաքըֆ  բնակավայրը, որը Թուրքիայի վերջին հայկական մնացած գյուղն է, կանգնած է օտարման վտանգի առաջ հանրային բնակարանային ծրագրի շրջանակում:

Bianet-ը գրում է, որ գտնվելով Հաթայի Սամանդաղ շրջանում, գյուղն ընդգրկված է Բնակարանային զարգացման վարչության (TOKİ) զարգացման լայնածավալ ծրագրում՝ որպես 2023 թվականի փետրվարի ավերիչ երկրաշարժերից հետո տուժած։

Ծրագիրը, որը ներառում է 1353 բնակարանային միավորի կառուցում, ընդգրկում է Վաքըֆլըի որոշ հատվածներ՝ ներառյալ բնակելի տարածքները, գյուղատնտեսական հողերը և գանձապետական ​​սեփականություն հանդիսացող գույքը։

Բնակիչները անհանգստացած են օտարման հեռանկարից՝ մտավախություն ունենալով, որ նախագիծը կվնասի գյուղի պատմական, մշակութային շերտերին։ Շատերն անհանգստանում են, որ Վաքըֆլըն կարող է կորցնել Թուրքիայի վերջին հայկական գյուղի իր յուրահատուկ կարգավիճակը:

Լրատվամիջոցի հետ զրույցում տեղի բնակիչներից մեկն ասել է «Այսօր Վաքըֆքյոյի, Հըդիրբեյի և Մաղարաջըքի ղեկավարները հանդիպում են նահանգապետի հետ։ Մենք՝ որպես գյուղի բնակիչներ, դեմ ենք այդ  որոշմանը։ Մենք դարեր շարունակ գոյություն ունեցող գյուղ ենք։ Մենք վախենում ենք ոչ միայն մեր մշակութային և պատմական ժառանգության, այլև մեր համայնքի ժողովրդագրական կազմի համար: Մեր գյուղի գրեթե կեսը գտնվում է էքսպրոպրիացիայի վտանգի տակ, և մենք խորապես անհանգստացած ենք Թուրքիայի վերջին հայկական գյուղի մեր ինքնությունը կորցնելու համար»։

Գյուղի մուխթար Բերչ Քարթունը ևս մեկնաբանել է իրավիճակը՝ նշելով, որ գյուղի ճակատագիրն ավելի պարզ կդառնա Հաթայի նահանգապետ Մուստաֆա Մասաթլիի հետ հանդիպումից հետո։ Նա  նշել է, որ գյուղացիներն անհանգստացած և վրդովված են ծրագրի հնարավոր ազդեցությունից:

Թարգմանությունը՝ Էմմա Չոբանյանի