Մերձդնեստրը պայմանավորվել է Մոլդովայի հետ գազի մատակարարումների մասին

Մերձդնեստրի և Մոլդովայի իշխանությունները պայմանավորվել են մոտ ապագայում չճանաչված հանրապետություն գազի մատակարարման շուրջ, «Կոմերսանտ»-ին հայտնել են իրազեկ աղբյուրները։ Նրանց խոսքով, այդ նպատակով Տիրասպոլն ու Քիշնևը պայմանավորվել են կիսել Եվրամիության 30 միլիոն եվրոյի դրամաշնորհը։

Օգտագործելով հատկացված միջոցները՝ Մերձդնեստրը նախատեսում է փետրվարի 1-ից 10-ն ընկած ժամանակահատվածում օրական գնել մոտ 3,2 մլն խմ գազ։ Մոլդովական Energocom պետական ​​ընկերությունը եվրոպական շուկայից վառելիք կգնի և այն կմատակարարի Դնեստրի ձախ ափին «Մոլդովագազ»-ի միջոցով։ Քիշնևը կշարունակի էլեկտրաէներգիա գնել սփոթ շուկայում՝ օգտագործելով դրամաշնորհի իր բաժինը:

Միևնույն ժամանակ, փետրվարի 11-ից, երբ ավարտվում են ԵՄ դրամաշնորհային միջոցները, Մերձդնեստրը հույս ունի Ռուսաստանից մարդասիրական օգնություն ստանալու վրա, նշել է «Կոմերսանտ»-ի աղբյուրներից մեկը։

Խոսքը հունգարացի թրեյդերների՝ MET International AG, MOL և MVM միջոցով գազի մատակարարումների ֆինանսավորման մասին է։ Չճանաչված հանրապետության ղեկավար Վադիմ Կրասնոսելսկին ավելի վաղ հայտարարել էր, որ Ռուսաստանը Տիրասպոլին վարկ կտրամադրի գազ գնելու համար։

Եվրահանձնաժողովը հունվարի 27-ին հայտարարել է Մոլդովային 30 մլն եվրո հատկացնելու մասին՝ Մերձդնեստր գազի գնման և փոխադրման համար։ Հանձնաժողովը պարզաբանել է, որ դրամաշնորհով գնված գազը պետք է հասցվի չճանաչված հանրապետություն, որպեսզի «օգնի վերականգնել էլեկտրաէներգիան և ջեռուցումը շրջանի ավելի քան 350,000 բնակիչների համար», ինչպես նաև վերսկսել էլեկտրաէներգիայի մատակարարումը Դնեստրի ձախ ափից։

Միաժամանակ նրանք նշել են, որ տրամադրված միջոցները «նախնական օգնություն» են տարածաշրջանին։ Փետրվարի 10-ից հետո կհաջորդի ևս մեկ փաթեթ՝ «ուղղված Մոլդովայի քաղաքացիների համար ճգնաժամի անմիջական սոցիալական հետևանքների մեղմմանը և Մոլդովայի Հանրապետության էներգետիկ անկախության և կայունության ամրապնդմանը»:

Թարգմանությունը՝ Տաթև Ֆռանգյանի