ԵՄ-ն մտադիր չէ բաժանարար գծեր ստեղծել, «գաղտնի օրակարգ» տանել․ ԵՄ հատուկ ներկայացուցիչ

«Ես լսել եմ հուսադրող հայտարարություններ տարածաշրջանում խաղաղության և կայունության, մասնավորապես՝ Հայաստանի ու Ադրբեջանի միջև հարաբերությունների կարգավորման գործընթացը շարունակելու մասին, ինչը հակադրվում է հանրային վայրերում հնչող ելույթների ագրեսիվ տոնին»,- այս մասին ադրբեջանական Report գործակալությանը տված հարցազրույցում հայտարարել է Հարավային Կովկասի ու Վրաստանում ճգնաժամի հարցերով ԵՄ նորանշանակ հատուկ ներկայացուցիչ Մագդալենա Գրոնոն՝ անդրադառնալով հունվարի 7-ից 11-ը Բաքու ու Երևան կատարած իր առաջին պաշտոնական այցերի մասին, որոնց ընթացքում հանդիպել էր ՀՀ վարչապետ Նիկոլ Փաշինյանին ու Ադրբեջանի նախագահ Իլհամ Ալիևին։

«Այս համատեքստում ես կարևորել եմ հանգիստ և դրական միջավայրի ապահովումը, որը նպաստում է չլուծված հարցերի շուրջ համաձայնությունների ձեռքբերմանը։ Ընդգծել եմ շուտափույթ համաձայնության հասնելու կարևորությունը թե՛ խաղաղության պայմանագրի, թե՛ հաղորդակցության և հումանիտար հարցերի շուրջ։ Կարծում եմ, որ կարգավորման առաջին կարևոր փուլն արդեն արդյունքներ է տալիս։ Ադրբեջանի և Հայաստանի միջև քննարկումների համար կա կառուցվածքային և լավ կազմակերպված շրջանակ»,-ասել է ԵՄ պաշտոնյան՝ նշելով, որ հիմա եկել է ժամանակը մեկընդմիշտ շրջելու հակամարտության էջը, գտնելու բոլոր չլուծված հարցերի փոխադարձ ընդունելի լուծումներ և քաղաքական կամք դրսևորելու, որը տարածաշրջանի բնակչության համար կապահովի խաղաղություն և ավելի բարեկեցիկ կյանք։

Նա նաև անդրադարձել է հարցին, թե Երևանի ու Բաքվի միջև երկկողմ բանակցությունների պայմաններում, որն է ԵՄ դերակատումը։

«Մենք Բաքվի և Երևանի հետ քննարկել ենք, թե ինչպես ԵՄ-ն կարող է ավելի արդյունավետ աջակցել Ադրբեջանի և Հայաստանի միջև հարաբերությունների կարգավորմանը և ավելի լայն տարածաշրջանային համագործակցությանը։ Այս փուլում մենք առանձնացրել ենք մի քանի ոլորտներ, որտեղ ԵՄ-ն պատրաստ է ավելին անել։ Բաքվում և Երևանում պայմանավորվել ենք, որ ԵՄ-ն կշարունակի աջակցել Ադրբեջանի և Հայաստանի միջև երկկողմ բանակցություններին՝ կենտրոնանալով հարաբերությունների կոնկրետ ասպեկտների և հումանիտար հարցերի վրա, մասնավորապես ականազերծման և անհայտ կորածների խնդրի լուծմանը, ինչպես նաև տարածաշրջանային համագործակցության նախաձեռնությունների խթանմանը»,- ասել է Գրոնոն՝ արձագանքելով նաև ադրբեջանական լրատվամիջոցի՝ ԵՄ-ի գործունեությանն ուղղված քննադատությունների մասին հարցին։

«Իմ հիմնական նպատակը կողմերի հետ թափանցիկ, անկեղծ և շարունակական երկխոսության միջոցով վերացնել հնարավոր թյուրիմացությունները։ Ինչպես գիտեք, իմ գրասենյակը ամենօրյա կապի մեջ է երկու երկրների տարբեր դերակատարների հետ։ Մենք կապերի զգալի ցանց ունենք պետական ​​պաշտոնյաների, քաղաքացիական հասարակության, տեղական փորձագետների և այնտեղ աշխատող միջազգային կառույցների միջև: Սա մեզ թույլ է տալիս տեղյակ մնալ տեղում տիրող իրավիճակին և առկա տարբեր միտումներին»,-նշել է ԵՄ ներկայացուցիչը՝ հավելելով, որ Բաքու իր այցի ընթացքում  մանրամասն քննարկել են, թե ինչպես կարելի է վերակազմավորել և վերականգնել ԵՄ-ի և Ադրբեջանի միջև քաղաքական երկխոսությունը ամենաբարձր և այլ մակարդակներում և այդ ֆոնին լսած առաջարկները փոխանցել է Բրյուսելին։  Ըստ նրա՝ ԵՄ-ի և Ադրբեջանի հարաբերությունները, իհարկե, չեն սահմանափակվում էներգետիկ և անվտանգության հարցերով։ Պաշտոնյան ասել է, որ Բաքու կատարած իր վերջին այցի ժամանակ ուշադիր լսել է զրուցակիցների դիրքորոշումները, նրանց գնահատականը  համագործակցության վերաբերյալ, ինչպես նաև որոշ դժգոհություններ և այդ բոլոր ուղերձները փոխանցել է Բրյուսելում ԵՄ նոր ղեկավարությանը։

Գրոնոն ընդգծել նաև է, որ Հայաստանի հետ երկկողմ օրակարգը, հարաբերությունները ևս լայն են, ինչը նշանակում է, որ այն չի սահմանափակվում ընթացիկ բարեփոխումներին, ժողովրդավարությանը և մարդու իրավունքներին ուղղված աջակցությամբ։

«Ես կարող եմ ձեզ վստահեցնել, որ ԵՄ-ն մտադիր չէ նոր բաժանարար գծեր ստեղծել տարածաշրջանում, ներգրավվել զրոյական գումարով խաղի մեջ կամ առաջ մղել «գաղտնի օրակարգ», ինչպես հաճախ եմ կարդացել այստեղ-այնտեղ։ Ընդհակառակը, մենք այստեղ ենք Բաքվի և Երևանի խնդրանքով և մեր երկու գործընկեր երկրներին օգնելու ցանկությամբ՝ շարժվել դեպի կայուն, ապահով և բարգավաճ ապագա։ ԵՄ-ն հավատարիմ է այս ռազմավարական տարածաշրջանին, ինչպես նաև Ադրբեջանի և Հայաստանի հետ հավասար գործընկերությանը»,-հայտարարել է Մագդալենա  Գրոնոն։

Թարգմանությունը՝ Էմմա Չոբանյանի