Թուրքիայում երեք ընդդիմադիր լրագրող է ձերբակալվել Ստամբուլի քաղաքապետի դեմ նոր հետաքննության գործով

Թուրքական ոստիկանությունը ձերբակալել է ընդդիմադիր Halk TV-ի երեք  լրագրողների՝ հեռուստաալիքի նկատմամբ հետաքննությունից անմիջապես հետո՝ «փորձագետի վրա ազդելու փորձի համար», գրում է Duvar-ը։

Halk TV-ի գլխավոր խմբագիր Սերհան Ասքերը, լրագրող Բարիշ Փեհլիվանը և հաղորդավար Սեդա Սելեքը ձերբակալվել են Ստամբուլում և Անկարայում գտնվող իրենց գրասենյակներում։

Հունվարի 27-ին Փեհլիվանը հեռարձակել էր հեռախոսազրույց Սաթըլմըշ Բույուքչանայակինի հետ, որը փորձագետ է, գլխավոր ընդդիմադիր Ժողովրդահանրապետական ​​կուսակցության (CHP) քաղաքապետերի դեմ մի շարք գործերով։ Դատախազության տվյալներով՝ խոսակցությունը ձայնագրվել ու տարածվել է «առանց թույլտվության»։ Գրասենյակը նաև նշել է, որ Փեհլիվանը թիրախավորված կերպով բացահայտել է փորձագետի անունը՝ «դատավարության ընթացքի վրա ազդելու նկատառումներով»։

Նախքան ձերբակալությունը Փեհլիվանն իր գրասենյակի շենքի առաջ հայտարարել է. «Ես լրագրող եմ եղել 22 տարի և բախվել եմ ավելի քան 100 հետաքննության և 50 դատավարության: ԱԶԿ-ի կառավարության օրոք ես հինգ անգամ բանտարկվել եմ»:

Հիշեցնենք, որ Ստամբուլի քաղաքապետ Էքրեմ Իմամօղլուն հունվարի 26-ի ասուլիսի ժամանակ փորձագետ Սաթըլմըշ Բույուքչանայակինին մեղադրել էր չարաշահումների մեջ։ Վերջինս առանցքային դեմք է դատական ​​գործընթացներում, որոնց արդյունքում ձերբակալվել են ընդդիմադր CHP-ից մի շարք քաղաքապետեր։

Այս հայտարարությունների համար Իմամօղլուի դեմ նոր հետաքննություն է սկսվել։

Թարգմանությունը՝ Էմմա Չոբանյանի