17.07.2026 | 23:30
ԲԸՏՄ-ում քննարկվել են COP17-ի նախապատրաստական աշխատանքներն ու տեսչության մասնակցությունը
Առաջիկայում կոնկրետ արդյունքներ կստացվեն ադրբեջանական օդանավի կործանման պատճառների վերաբերյալ․ Ադրբեջանի գլխավոր դատախազ
Քաղաքականություն
27.01.2025 | 20:14
Ղազախստանի և Ռուսաստանի Դաշնության դատախազության և այլ համապատասխան կառույցների հետ համատեղ կատարվում են քննչական գործողություններ՝ Ադրբեջանական ավիաուղիների օդանավի կործանման իրական պատճառները պարզելու ուղղությամբ։ Ադրբեջանական լրատվամիջոցների հաղորդմամբ՝ այս մասին հայտարարել է Ադրբեջանի գլխավոր դատախազ Քյամրան Ալիևը գլխավոր դատախազության կոլեգիայի այսօրվա նիստում։
Նա նշել է, որ կարճ ժամանակում կոնկրետ արդյունքներ կստացվեն։
Քյամրան Ալիևը հավելել է, որ երկրի նախագահ Իլհամ Ալիևի հրամանով ստեղծվել է Պետական հանձնաժողով վարչապետի գլխավորությամբ՝ ուսումնասիրելու Ռուսաստանի օդային տարածքում արտաքին ֆիզիկական և տեխնիկական միջամտության հետևանքով Ակտաուի մոտ տեղի ունեցած վթարի պատճառները, հարուցվել է քրեական գործ։
Հիշեցնենք, որ օրերս ադրբեջանական իշխանամերձ լրատվամիջոցը հայտնել էր, որ ինքնաթիռի կործանման դեպքի առթիվ Ռուսաստանում անցկացված քրեական գործի հետաքննությունը հաստատել է, որ օդանավը խոցվել է «Պանցիր Ս-1» հակաօդային պաշտպանության համակարգով։ Ըստ ադրբեջանական կառավարության իրազեկ աղբյուրների՝ եթե Ռուսաստանը փորձի փակել գործը և չհրապարակի հետաքննության արդյունքները, ապա Բաքուն կդիմի միջազգային իրավական կառույցներին։
Թարգմանությունը՝ Էմմա Չոբանյանի
